Link açıqlığı

Qırımdaki jurnalistlerniñ telükesizligi ve haber vastalarınıñ serbestligi aqqında Strasburgda qonuştılar – Ukraina Haber siyaseti nazirligi


Yüriy Stets, arhiv resimi

Strasburgda yanvar 19, cumaaqşamı künü Ukraina haber siyaseti naziri Yüriy Stets Avropa Şurasınıñ Baş kâtibi Thorbjorn Jagland ile körüşip, Rusiye tarafından işğal etilgen Qırım, Donetsk ve Lugansk vilâyetleriniñ topraqlarında kütleviy haber vastalarınıñ serbestligi ve jurnalistlerniñ telükesizligi aqqında qonuştı. Bunı yanvar 23 künü Ukraina Haber siyaseti nazirliginiñ matbuat hızmeti bildirdi.

«Yüriy Stets, Rusiye tarafından işğal etilgen Qırım, Donetsk ve Lugansk vilâyetleriniñ topraqlarında kütleviy haber vastalarınıñ serbestligi ve jurnalistlerniñ telükesizligi mevzusını köterdi ve Avropa Şurasını cüratnen areket etmege ve söz serbestligi ile jurnalistlerniñ telükesizligine kefil olmaq talabınen işğalci-devlet Ruseyege basqı yapmağa çağırdı. Ayrıca, Stets tafsilâtlı şekilde Thorbjorn Jaglandnı Nikolay Semena ve Roman Suşenkonıñ işleri aqqında haberdar etti ve olarnıñ aqlarını qorumaq ve şatrsız azat etmek içün aktif adımlar atmağa çaüırdı», – dep aytıla bildirüvde.

Bundan evel sabıq siyasiy mabus Gennadiy Afanasyev, Avropa Şurasınıñ Baş kâtibi Thorbjorn Jagland ile körüşip, Qırımda ve qomşu Rusiyede insan aqlarınıñ bozuluvı, qırımtatar faalleriniñ quvalanuvı, jurnalistler Suşenko ve Semenanıñ taqip etilmesi aqqında tarif etkeni aqqında haber etilgen edi.

Baarde Qırımda Qırım.Aqiqat ile işbirliginde şeklengen jurnalistlerniñ evlerinde tintüvler olıp keçti. Radio Svoboda müellifi Nikolay Semenağa qarşı Rusiye Federatsiyasınıñ topraq bütünligini bozmaq çağıruvları şeklenmesi ile cinaiy iş açıldı. Rusiye taqiqatı oña yarımadanı terk etmege yasaq etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG