Link açıqlığı

Avropa Şurası Parlament assambleyasındaki Ukrainanıñ daimiy eyyeti, Qırım uquq qorçalayıcı gruppası ve Qırımtatar Milliy Meclisi yanvar 23-de Strasburgdaki PACE qış sessiyasında «Azap, qaçıruv, siyasiy taqip: Qırım adaletni istey» (Tortured, disappeared, persecuted: Crimea is asking for justice) mevzulı tedbir keçirecek olalar. Bunı Qırım uquq qorçalayıcı gruppası (Crimean Human Rights Group) bildire.

Uquq qorçalayıcı gruppasınıñ malümatına köre, muzakere iştirakçileri arasında: Mustafa Cemilev, Ukraina halq deputatı, Ukraina prezidentiniñ qırımtatar halqı işlerinden vekâletlisi; Olga Skripnik, Qırım uquq qorçalayıcı gruppasınıñ reberi; İgor Kötelânets, siyasiy mabus Yevgeniy Panovnıñ qardaşı; Nikolay Polozov, siyasiy mabuslar Ahtem Çiygoz, İlmi Ümerovnıñ advokatı.

«Olga Skripnik Qırım uquq qorçalayıcı gruppasınıñ Qırımda Rusiyeniñ qanunsız kontroli neticesinde insanlarnıñ qaçırılmasına dair maruzasını taqdim etecek. O, PACE delegatlarına Ukrainanıñ doquz vatandaşına qarşı açılğan yañı siyasiy cinaiy işler, «ukrain diversantları davası» boyunca qanunsız alda yaqalanğanlar ve evinde ukrain bayrağı tiklengen ukrain faali Vladimir Baluh aqqında tarif etecektir», – dep aytıla uquq qorçalayıcı gruppasınıñ haberinde.

Ukraina Yuqarı Radasınıñ insan aqlarından vekâletlisi Valeriya Lutkovskaya 2016 senesi dekabr 26-da işğal etilgen Qırımğa barıp, 42 ukrain siyasiy mabusından üçüni ziyaret etti. Ombudsmen «fevral 26 davasınıñ» üç mabusı – Ahtem Çiygoz, Ali Asanov ve Mustafa Degermenci ile körüşti.

Ukraina Tışqı işler nazirligi hususan siyasiy sebeplerden yaqalanğan ukrainalılarnıñ aq-uquqları bozulğanından sebep Rusiyege narazılıq bildirgen edi. Rusiye Taqiqat komiteti ekstremizm, diversiyalar, casuslıq ile qabaatlanğan Ukraina vatandaşlarınıñ qabaatını isbatlağan deliller bar olğanını bildirdi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG