Rusiyede «Strategiya-18» müddetsiz aktsiyasınıñ faalleri yanvar 18-de Sankt-Peterburgdaki Nevskiy caddesine çıqıp, advokat Nikolay Polozovnı taqip etmemege çağırdı ve qırımtatarlarğa qoltutqanını bildirdiler.
«Advokat Nikolay Polozov Qırımdaki mahsus hızmetlerniñ basqısına oğray, ve bizler onıñ zenaatdaşları akimiyetniñ oña qarşı yapqanlarına uquq ceetinden qıymet keser, dep ümüt etemiz. Rusiye Federatsiyası akimiyetinden Polozovnı taqip etmemege ve Qırımda advokat ve uquq qorçalayıcılarnıñ faaliyeti içün yapqan manialarını yoq etmege talap etemiz», – dep derc ete muracaatını faaller Facebookta.
Lâqayt qalmağan rusiyeliler er ay aktsiyağa çıqıp, Qırımdaki insan aqlarınıñ vaziyetini hatırlatalar.
«Strategiya-18» müddetsiz aktsiyasını devam ettik, er aynıñ 18-de şeerimizde aktsiya keçirecekmiz. Kün saylanması 1944 senesi qırımtatar sürgünliginiñ başlaması ile bağlıdır. 2014 senesinden başlap Qırımda işğalci Rusiye akimiyetiniñ siyaseti qırımtatarlarğa nisbeten Stalin diktaturasınıñ cinayetlerini devam ettirgenini kösterecek olamız», – dep ayta gruppa iştirakçileri.
İlk sefer aktsiya teşkilâtçıları 2016 senesi noyabr ayında bir kişilik piketlerge çıqqan edi.
Dekabr 20-de Qırımda advokat Nikolay Polozovğa qarşı cinaiy iş ğayrıdan açıldı. Uquq qorçalayıcılar Rusiye uquq qoruyıcı sistemasınıñ bu areketleri Polozovnı «fevral 26 davasınıñ» imayesinden ayırmaq içün yapıla, dep tüşüne.
Rusiyeniñ Qırım işğalinden soñ qırımtatarlar yarımadada Rusiye akimiyetini tanımadı. Böylece, Qırımnıñ şimdiki akimiyeti ve uquq qoruyıcıları olarğa qarşı basqı yapmağa başladılar. Dünya toplulığı Qırımda insan aqlarını qorçalamağa çağıra, Rusiyeden ise yarımadada insan aqlarına riayet etmesini talap ete. Qırımda bir sıra mahkeme esnası keçirile, tintüv ve apis cezaları devam ete. Uquq qorçalayıcılar Rusiye akimiyetiniñ Qırımda yapqanları «siyasetnen bağlıdır» deyler.
2014 senesi mart 20-de Yuqarı Rada qırımtatarlarnı Qırımnıñ tamır halqı olaraq tanıdı. Buña 283 deputat qotuttı.
Ukraina qırımtatarlarğa Ukrainanıñ tamır halqı olaraq etnik, medeniyet, til ve din kimliginiñ inkişaf etmesi ve saqlap qalmasını kefil etmektedir.
