Moskvalı advokat Nikolay Polozov yaqın vaqıtta Meclis reisiniñ muavini İlmi Umerov içün advokat satusından marum qala bile. Keçken sene sentâbr ayından berli FSB onı bu iş boyunca sorğudan keçirmege tırışa. Ve, eger de, taqiqatçılar bunı yapıp olsalar, Rusiye qanunlarına binaen, o mahkemede Umerovnıñ imayecisi olıp çıqamacaq. Polozov, FSB-niñ areketlerini qanunsız tanıy ve sorğudan keçmekni red ete, lâkin sorğu mecburen de keçirilmek mümkün olğanını inkâr etmey.
Moskvalı Nikolay Polozov Qırımtatar Milliy Meclis reisiniñ muavini İlmi Umerovnıñ dört advokatından biri ola. Siyasetçini daa rusiyeli Mark Feygin ve onıñ qırımlı işdeşleri – Edem Semedlâyev ve Edem Kurbedinov qorçalaylar.
Umerov, keçken sene mayıs ayından berli taqiqat astında buluna. FSB onı Rusiye Cinaiy kodeksiniñ 280.1 maddesiniñ bozuluvında qabaatlay – Rusiye Federatsiyasınıñ topraq bütünligini bozmaq çağıruvları. Rusiye Qırımğa dair topraq iddialarından vazgeçmek kerek olğanı aqqında Umerovnıñ sözlerini, mahsus hızmet taqiqatçıları cinayet olaraq tanıylar.
Keçken yılnıñ küzünden berli FSB Nikolay Polozovnı bu işten çıqarmağa tırışa. Onı defalarca sorğuğa çağırdılar. Lâkin sorğudan keçse, rusiyeli advokat Umerovnı qorçalap olamaycaq, çünki bundan soñ şaat olaraq keçecek.
Nevbetteki sefer taqiqatçılar, yanvar 16 künü Polozovnı celp etecek ediler. Ahtem Çiygoznıñ işi boyunca mahkemede ilk kere advokatnıñ yanına FSB hadimi İgor Skripka keldi ve oña celpnameni bermege tırıştı.
«Men kene de red ettim. Süyrep ketireceklerinen qorquttı. Şimdi, bese-belli, FSB organları meni Qırımda mecburen (esir etip) alacaqlarını beklemek kerekim. Mındaki işler böyledir», – dep beyan etti Polozov.
Advokat sırınıñ cenazesi
FSB taqiqatçısı İgor Skripka ilk kere keçken sene sentâbrde advokatnı sorğuğa çağırmağa tırışqan edi. O bu aqta muracaatnı Kreml kontrolündeki Aqmescitteki Kiyev bölge mahkemesine yollağan edi. Mezkür muracaatında o Polozovnıñ çağırılması içün sebepni açıqlağan edi. Bu areket böyle añlatıla: vesiqalardan birinde advokat, onıñ müşterisi İlmi Umerov – Meclis reisiniñ muavini olğanını yazğan eken. Keçende ise Milliy Meclis Rusiyede ekstrimistik teşkilât olaraq tanılğan soñ, FSB, sanki, Polozovnı soraştırmaq kerek, Umerovnıñ bu teşkilât ile nasıl alâqası bar eken.
Şaşırtıcı olsa da, Aqmescitniñ Kiyev rayon mahkemesi advokatnıñ sorğuğa çağırılması aqqında muracaatnı red etti. Bundan soñ Rusiye mahsus hızmetiniñ hadimi bu qararğa qarşı itiraz bildirdi, ve o 8 noyabrde baqıldı. Mahkemeci FSB itirazını qabul etti ve Polozovnıñ sorğudan keçirilmesi aqqında muracaatnı ilk mahkemege qaytardı. O dekabr 13 künü tekrar baqıldı.
Nikolay Polozovnıñ özü o künü Qırımnıñ tışında edi, ve özü advokatnıñ hızmetine muracaat etmek mecbur oldı. Mahkemede onıñ menfaatlarını Aqyarlı adliyeci Oksana Jeleznâk temsil ete edi.
Bu sefer Kiyev bölge mahkemesi sorğunıñ ötkerilmesi aqqında muracaatnı qabul etti. Advokat Oksana Jeleznâk beyan etti ki, alğan qararı ile mahkemeci Mojelânskiy «advokat sırınıñ cenazesini qıldı».
«Mahkemelerde aqiqat ve adalet üküm sürmek kerek, raqiplik ve Qanun ögünde musaviylik. Lakin bu, teessüf ki, bügün yoq edi. Keder ile bildirmek kerekim, mahkeme içün bu ümdeler yat kele. Mahkeme atta, advokatnıñ sorğulanması aqqında sual advokatnıñ ya da temsilcileriniñ iştiraginen baqılmaq kerek olğanını tüşünmedi bile, mahkeme toplaşuvı maqbul sebeplerden keçiktirilmek kerek olğanı aqqında bütün muracaatlarnı körmemezlikke urdı», – dep ayttı o Qırım Haber Agentligine bergen izaatında.
Dekabr 22 künü Polozov mahkemenin qabul etkeni bu qararğa qarşı itiraz bildirdi. Bügünki künge qadar bu itiraz daa baqılmadı, ve, demek ki, qarar daa küçüni almadı. Buña baqmadan, advokatnıñ sözlerine köre, taqiqatçı Skripka onı mecburen FSB idaresine ketireceginen qorqutacaq oldı.
«Er şey sessiz yapılmalı»
Polozovnıñ safdaşı Mark Feyginniñ fikirine köre, onıñ zenaatdaşı mıtlaqqa Umerovnıñ işinden çetleştirilecek, bu sadece vaqıt meselesi.
Bu belli derecede Umerovnıñ özüni imaye aqqından marum ete, çünki, elbette ki, advokat Polozov onıñ qorunmasına ğayet salmaqlı isse qoşa bilecek ediMark Feygin
«Bu belli derecede Umerovnıñ özüni imaye aqqından marum ete, çünki, elbette ki, advokat Polozov onıñ qorunmasına ğayet salmaqlı isse qoşa bilecek edi. Onı işten mustaqil advokat olaraq çetleştireler. Bu Moskvalı advokat, ve o yerli, bu kibi ceryanlarda tecribesi olğan, advokatlar qadar basqıdan tesirlenmey. Menim şahsiy fikirime köre, onı mıtlaqqa çetleştirecekler», – dedi Feygin Qırım.Aqiqatqa bergen izaatında.
Onıñ sözlerine köre, eger de Polozovnı sorğudan keçirseler, artıq o qabaat qararında şaat olaraq keçecek, ve mahkemede İlmi Umerovnı qorçalap olamaycaq. Feygin qayd ete ki, onıñ fikirine köre, advokatnı sorğuğa celp etmekniñ sebebi de büs-bütünley uydurılğan ve qanunğa uymay.
«Sebep – onıñ baş prokuraturağa yollağan şikâyeti oldı. Vesiqada o sanki Umerovnıñ Qırımtatar Milliy Meclis reisiniñ muavini vazifesi aqqında bilgi bere, Meclis ise yasaq etilgen. Bu ne – taqiqat tarafından advokatnı sorğudan keçirmege kerektirgen bir malümatmı?» – dep efkârlana Mark Feygin.
O tahmin ete ki, onıñ zenaatdaşına qarşı bir operativ programma işletile, ve böylece İlmi Umerovnıñ üzerinde ötkerilgen mahkeme mümkün olğanı qadar sessiz ve duyulmadan keçirilsin.
«Olar içün bu mahkeme ceryanında faal surette iştirak etecek advokatlarnıñ olmaması pek müimdir, cemaatnıñ diqqatını ve dünya toplulığınıñ diqqatını İlmi Umerovnıñ işine celp etmesinler. Olar içün er şey yavaştan ve sessiz keçkeni müimdir», – dey advokat.
İlmi Umerovnıñ özü FSB tarafından yapılğan areketlerni tenqid ede ve bu kibi adiselerni onıñ halqına destek bergenlerni qorqutmaq içün yapılğan qorqutuv olaraq tanıta.
Esas vazife – başqalarğa ibret olsun. Olar qorsın da, Qırım ve qırımtatarlarnıñ problemlerinen oğraşmasınİlmi Umerov
«Yüksek ihtisaslı advokatnı, şaatqa çevirip, çetleştirmege tırışalar. Elbette ki, men buña menfiy baqam. Bu olarnıñ birinci vazifesi, lâkin eñ esas vazifeleri degil. Esas vazife – başqalarğa ibret olsun. Olar qorsın da, Qırım ve qırımtatarlarnıñ problemlerinen oğraşmasın. Maqsad – qalğanlarnı qorqutmaq», – dedi Meclis reisiniñ muavini Qırım.Aqiqatqa bergen izaatında.
Umerovnıñ kesken qıymetine köre, onıñ işi boyunca bütün taqiqat işleri endi ötkerildi, lâkin belli olmağan sebeplerden mahkeme alâ daa başlanmadı. Onıñ fikirince, bu mesele adiy taqiqatçılarnen bağlı degil, ve FSB hadimleri yuqarıdan – onıñ cinaiy işini sımarlağan şahıslardan, kelecek emirni bekleyler.
