Link açıqlığı

Rusiye halqara talaplarnı yerine ketirse, Qırımda insan aqlarına riayet etilmesi müsbet tesir körecektir – Celâl


Nariman Celâl

Ukraina Birleşken Milletler Teşkilâtınıñ Halqara mahkemesinde açtırğan davada qayd etilgen talaplar Rusiye tarafından yerine ketirilse, Qırımdaki insan aqlarına riayet etilmesi müsbet tesir körecek, faqat «şimdilik Rusiye bunı iç meselesi kibi kösterecek ola». Böyle bir fikirni Qırımtatar Milliy Meclisiniñ reis muavini Nariman Celâl Qırım.Aqiqatqa seslendirdi.

«Ukrainanıñ Halqara mahkemede bu areketlerine qoltutamız ve Rusiye olarğa razı olıp yerine ketirmege, eñ az Qırımda insan aqlarına riayet etmek kerek, dep tüşünemiz... Ekinci mesele de bar, şahsen men ve meslekdeşlerimniñ ekseriyeti Rusiye Ukraina ve halqara toplulıqnıñ talaplarını yerine ketirmez, dep tüşünemiz», – dep qayd etti Celâl.

O, al-azırda Rusiye Qırımda bir sıra halqara senetni boza, «milliy ve siyasiy sebeplerden ayrı insanlar ve taqımlarnı adaletsiz ve qanunsız bir şekilde taqip ete», dep hatırlattı. Bu areketleri ise Rusiye halqara añlaşmalarnıñ talaplarına riayet etmege istemegenini köstere.

«(Halqara mahkeme qarar alğanına – QA) qadar Rusiye Federatsiyası apis cezaları ve taqip içün bir sıra manaçıq tapar, taqip etmege toqtaycaqlarını tüşünmeyim», – dedi o.

Yanvar 16 künü Ukraina BM Halqara mahkemesine muracaat etip, terrorizm ve ırq ayırımına maddiy destekekniñ toqtatılması aqqında halqara konventsiyalar Rusiye tarafından bozulğanına şikâyet etti. Ukraina Tışqı işler naziligi Rusiye Qırımda rus olmağan cemiyetler, şu cümleden etnik ukrain ve qırımtatarlarnı ayırımğa oğratıp, millet ayırımınıñ er angi çeşiti ile küreş Konventsiyasını boza, dep qayd ete.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.


XS
SM
MD
LG