Qırımtatar Milliy Meclis reisi Refat Çubarov, ukrain deputatı Nadejda Savçenkonıñ, Donbassnı barışıqlı usullarnen qaytarmaq içün işğal etilgen Qırımnıñ meselesi vaqıtınca keçiktirilmek kerek olğanı aqqında beyanatını, ukrain halqınıñ menfaatlarına hainlik olaraq tanıy. Bunı o yanvar 18 künü Ukraina Yuqarı Rada toplaşuvında beyan etti.
Çubarov dedi ki, o Savçenko ile qonuşıp, onı bu meselede öz noqta-i nazarını daa doğru açıqlamağa çağırdı.
Bundan da ğayrı Refat Çubarov, parlament meclisinde Ukraina prezidenti Petro Poroşenkoğa muracaat etip, Qırımnıñ statusını muzakere etmek içün eñ yaqın zamanda Konstitutsion Komissiyanıñ toplaşuvını ötkermege çağırdı.
«Ukraina prezidentini, eñ yaqın zamanda Konstitutsion Komissiyanı toplap, Qırımnıñ statusınen, yarımadamıznıñ keleciginen oğraşmağa çağırmağa ister edim», – dedi o.
Bundan evel Yuqarı Rada deputatı Nadejda Savçenko, Ukraina, Qırım meselesi vaqıtınca keçiktirilmese, Donbassnı barışıq ile qaytarıp olamaycağı aqqında beyan etti.
Savçenkonıñ sözlerine köre, «Donbassnı daa bir Pridnestrovyege çevirmemek içün» böyle yapılmaq kerek. Barışıqlı usullarnen vaziyetni çezmek içün bundan ğayrı başqa yol o körmey.
