Yuqarı rada deputatı Nadejda Savçenkonıñ fikrine köre, Donbassnı barışıq yolu ile Ukrainanıñ kontrolüne qaytarmaq içün Rusiye tarafından ilhaq etilgen Qırımğa dair iddialarından vaqtınca vazgeçmek kerek.
«Bazı millet vekilleri ne qadar bağırsalar da, ne qadar vışıvanka (ukrain örneklerinen nağışlanğan kölmek – QA) üstlerinde yırtsalar da, teslim etmeycegimiz aqqında ne qadar bağırsalar da. Olar Qırımdan vazgeçmek mecburlar», – dedi o «112 Ukrina» telekanalınıñ efirinde.
Savçenkonıñ sözlerine köre, şimdi Qırım tanılmağan işğal etilgen topraq olaraq qala. «Qırım – bu nevbetteki Pridnestrovye», – dey o. Ve Donbassnı da Pridnestrovyege çevirmemek içüm, Qırımdan vazgeçmege kerek. Onıñ fikine köre, bu mesele barışıq usullarnen başqa iç bir şekilde çezilmek mümkün degil.
Bundan evel Savçenko, Donbasstaki «rus-ukrain» cenki 2016 senesi yekünlenecegini beyan etken edi. Em de o ayırımcılarnıñ yetekçilerinen doğrudan-doğru muzakereler ötkermege teklif ete edi. Dekabr ayınıñ başında Minskte o, özlerini ilân etken Donetsk ve Lugansk «halq cumhuriyetleriniñ» yolbaşçılarınen körüşti. Ukrain deputatı dey ki, bu körüşüv devamında o işğal etilgen Donbassnıñ qısımında, Qırımda ve Rusiyede tutılğan ukrainlilerniñ ve ayırımcılarnıñ Kyivten rica etken şahıslarnıñ cedvelini alğan edi, ve onı yanvar 10 künü derc etti.
2016 senesi mayıs ayında Kreml, eki jurnalistniñ öldürüvinde iştirak etkeninde qabaatlanıp Rusiyede 22 yılğa azatlıqtan marum etilgen Savçenkonı, Ukrainada yaqalanğan eki rus askerine deñiştirip, yiberdi.
