Link açıqlığı

Kyivde qırımtatarlarnıñ etnik kimligini saqlamaq maqsadı ile azırlanğan leyha taqdim etildi


Qırımtatarları, arhiv resimi

Kyivde yanvar 18 künü «Uzorı mira» («Dünya örnekleri») leyhası taqdim etildi, onıñ maqsadı – qırımtatarlarnı birleştirmek, cemiyetke qoşmaq ve etnik kimligini saqlamaqtır. Leyha çerçivesinde qırımtatar el sanatlar kolektsiyası azırlandı, dep haber ete Qırım.Aqiqat muhbiri.

Ukraina Medeniyet naziriniñ Qırım sualleri boyunca mesletçısı ve «Uzorı mira» leyhasınıñ reberi Esma Aciyeva dey ki, bu leyha – Qırım işğali şaraitlerinde qırımtatar cemiyetini birleştire bilecek faktorlardan biridir.

«Bizim leyhamız – bu barışıq ğayeleriniñ kösterilmesidir. Bir taraftan bu – qırımtatar halqında evel-ezelden bar olğan medeniy diplomatiyanıñ bir qısımıdır. İçtimaiy medeniyet ve medeniy tedqiqatlar mutehassısları deyler ki, sanaat vastası ile özüni tanımaq – müşkül şaraitlerde cemiyet içün birleşüvniñ küçlü faktorlardan biri ola», – dep ayta nazirniñ mesleatçısı.

Aciyevanıñ sözlerine köre, leyha çerçivesinde dört ustahane açıldı, ve olarda qırımtatarlarnıñ el sanatı yañıdan tertip etile.

«Leyhanıñ eñ başında bizler quyumcı ustahanesi içün kerekli donatmalarnı alğan edik. Rustem Skibinniñ («El-Çeber» CT yolbaşçısı, ressam – QA) azır resursı – çolmekçilik ustahanesi endi azır bar edi. Daa eki iş yeri: demircilik ve unikal qırımtatar nağış ustahaneleri. Tecribeli qırımtatar ustaları genç talebelerni ögretip, neticede – qırımtatar el sanatlar koleksiyasını tertip ettiler, onda ğayırdan yaratılğan qadın ve ekrek milliy qıyafetleri, ayaqqap, maişet ve quyumlar toplanılğan», – dedi Aciyeva.

Leyha teşebbüsçileriniñ sözlerine köre, tertip etilgen kolektsiya yanvar 21 kününden başlap Kyivde İvan Gonçar adına müzeyde er kes içün kösterilecek.

XS
SM
MD
LG