Rusiye uquq qoruyıcıları Qırımnıñ siyasiy mabuslarınıñ qabaatını isbatlamaq içün kerekli qadar delil tapamayıp, taqiqatnı soza, qabaat maddeleri de deñişe, dep bildirdi «Qırım birdemligi» birleşmesiniñ faali Enver Şerfiyev Qırım.Aqiqatqa.
«Qırımtatar musulmanlarını 2015 senesi taqip etmege başladılar. 2015 yılında sözde «Hizb ut-Tahrir davası» boyunca dört musulman yaqalandı, taqiqat bir yıldan ziyade devam etti. Apiske alınğan diger insanlar da aynı vaziyette edi. Menim fikirimce, taqiqat sozula, çünki şeklengenler adiy musulmanlar ola, taqiqat ise olarğa qabaat ükmüni çıqarıp olamay», – dep qayd etti Enver Şerfiyev.
Cemaat faaliniñ zanınca, aynı bu sebepten taqiqat apiske alınğan Qırım siyasiy mabuslarınıñ qabaat maddesini deñiştire.
«Musulmanlarnı sözde «Hizb ut-Tahrir» davasında» Rusiye Ceza kodeksiniñ 205.5 maddesiniñ birinci ve ekinci qısımları boyunca qabaatladılar. Amma taqiqat bu dava boyunca bir delil tapamayıp, bu işniñ mabuslarını Rusiye Ceza kodeksiniñ 278-inci maddesi boyunca qabaatlamağa qarar aldı», – dep izaatlay vaziyetni Şerfiyev.
Cemaat faaliniñ fikirince, Rusiye akimiyeti qırımtatar fallerini qorquzmağa tırışa.
2016 senesi aprel 9-da Aqyara Qırım insan aqları bağ gruppası «Hizb ut-Tahrir» teşkilâtına bağlı olmasınen qabaatlanğan musulmanlarnıñ soy-soplarını topladı. Soñra «Qırım birdemligi» Qırımnıñ diger siyasiy mabusları, em de qaçırılğan ve ğayıp olğan musulmanlarnıñ aileleri içün öz qapularını açtı. Mında advokatlar da bar edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terrorist usullarnı red ete ve Rusiyede adaletsiz taqip etilgenini bildire. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti. Bundan ğayrı, işbu teşkilât Qazahistan, Qıtay ve bir qaç Asiya ve Afrika memleketinde yasaq etildi. Almaniyada «Hizb ut-Tahrir» teşkilâtınıñ faaliyeti sıñırlana. Ukraina ve çoqusı Ğarp memleketinde teşkilât çalışa bile.
