Ukraina devlet sıñır hızmeti, evel FSB tarafından derc etilgen malümatnı ve Qırım ile memuriy sıñırda Ukraina vatandaşı yaqalanğanınıñ sebeplerini tasdiqladı. Ukraina tarafından yapılğan teşkerüvniñ neticelerini Qırım.Aqiqatqa Devlet sıñır hızmeti yolbaşçısınıñ yardımcısı, matbuat kâtibi Oleg Slobodân bildirdi.
«Bu adise yanvar 5 künü yüz bergen edi. Bu vatandaşqa, bese-belli, Rusiye Fedeatsiyasına kirmege yasaq etilgen edi. O pasportını coyğan ya da bir de bir qanuniy esaslarda vesiqanı diger belgilerge alğan edi. Böylece, onı yaqalamaq içün sebeplerimiz yoq edi, belki de, filtrleme tedbirleri çerçivesine, işğal etilgen topraqta rus akimiyetiniñ vekilleri bu vatandaşqa Rusiye Federatsiyasına keçmege yasaq etilgenini belgiledi ve bundan soñ o, başqasınıñ belgileri ile pasport alğanını itiraf etti», – dedi Slobodân.
Ukraina Devlet sıñır hızmeti bu adise boyunca teşkerüvlerni devam ettire. Lâkin, yaqalanğan şahısnıñ işğal etilgen yarımadadaki taqdiri aqqında malümatnı sıñır hızmetiniñ vekillerinden ögrenmege mümkün degil.
Yanvar 10, salı künü Kremlniñ nezareti astında çalışqan Qırım sıñırındaki FSB idaresi, yanvar 5 künü Ukraina vatandaşı yaqalanğanını bildirdi, o sanki, yarımadağa keçmek içün soyadını deñiştirgen. Herson vilâyetiniñ 43 yaşındaki sakini köstergen pasportta qayd etilgen malümatlar – Rusiyege kirişi yasaq etilgen insannıñ malümatları ile aman-aman aynı edi.
Qırım 2014 senesiniñ başında Rusiye tarafından işğal etilgen soñ Ukainanıñ qıtaiy qısımı ve yarımda arasında asılında memuriy, lâkin fakt olaraq kerçek «sıñır» keçirildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
