Link açıqlığı

Kyivdeki Apellâtsion mahkeme Podol ve Desna rayon mahkemelerine devlet hainligi ile qabaatlanğan 11 sabıq Qırım deputatınıñ işini yollaycaqtır. Bunı mahkemeniñ matbuat hızmeti yanvar 3-de bildirdi.

Mahkeme qararına köre, Desna mahkemesi sabıq deputatları Anatoliy Zaiçenko, Yefik Fiks, Sergey Şuvaynikov, Edip Gafarov, Sergey Tsekov ve Grigoriy İoffege qarşı işlerni baqacaq.

Sabıq deputat Konstantin Baharevniñ işi Podol rayon mahkemesine yollanıldı.

Vitaliy Nahlupin ve Svetlana Savçenkonıñ işleri qayd baqılacağını belgilemediler, çünki olarnıñ imayecileri kelmedi.

11 sabıq Qırım deputatı devlet hainligi ile qabaatlana. Cinaiy işlerniñ taqiqatı devamında Qırım Muhtar Cumhuriyetiniñ prokuraturası «2014 senesi mart ayında Qırım Muhtar Cumhuriyeti Yuqarı Şurasınıñ bu deputatları Qırım işğaline yardım etkenini ve qoltutqanını isbatlağan» deliller taptı.

«Olar qanunsız «Qırım Cumhuriyeti» devlet qurulışınıñ meydanğa ketirilmesine dair bir sıra qararnı qabul etkenler. Olarnı on eki yıldan on beş yılğa qadar apis cezası bekley», – dep bildirdi QMC prokuraturası.

Qırım prokurorı Günduz Mamedov qayd etti ki, Qırım Muhtar Cumhuriyetiniñ prokuraturası «ğıyabiy cinaiy iş» mehanizmini qullanacaqtır.

«Qırım Muhtar Cumhuriyetiniñ 11 sabıq deputatına qarşı mahkemeden aldın taqiqatnı yekünledik. Er şey endi başlana», – dep tekrarlay Mamedovnıñ aytqanlarını matbuat hızmeti.

Yanvar 2-de Kyiv mahkemesi sabıq Qırım deputatlarınıñ işi qayda baqılacağını belgileycek, dep bildirgen edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG