Link açıqlığı

Qırımtatar Milliy Meclisi reis muavini Ahtem Çiygoznıñ ömür arqadaşı – Elmira Ablâlimova, ukrain obudsmeni siyasiy mabuslarnen körüşkenini «kerekli ve vaqıtında» yapılğan areket olaraq qabul ete. Bunı Ablâlimova Qırım.Aqiqatqa bergen izaatında bildirdi.

«Körüşüv taqiqat odalarından birinde keçirildi. Raat surette keçti. Ahtem, «26 fevral» işinen bağlı hususlarnı açıqladı, Qırımda qırımtatarlarğa nisbetten devam etken basqılar, tintüvler ve yaqalavlar aqqında tarif etti. Bunen beraber advokatqa yapılğan basqı aqqında söz yürsetildi, oña qarşı prokuratura tarafından teşkerüvler alıp barılğanı aytıldı. Bizim fikirimizce, bu pek kerekli ve vaqıtında yapılğan ziyaret oldı. Bügünki künde – bu ukrain ombudsmeniniñ Qırımğa yapqan ilk ziyaretidir», – dedi o.

Ablâlimovanıñ sözlerine köre, Çiygoz ombudsmennen ayrı körüşüv aqqında rica etti, lâkin oña izin bermediler.

«Körüşüvde Ahtem, men, Polozov, Ukraina ve Rusiyeniñ insan aqlarından eki vekâletlisi, apishaneniñ hadimleri ve, bese-belli, Qırım prokuraturasınıñ vekilleri bar edi. Ahtem Ukrainanıñ insan aqlarından vekâletlisi ile ferdiy subet aqqında rica etti, lâkin oña ancaq eki vekâletliniñ iştiraginen subet keçirmege izin berildi», – dep añlattı Ablâlimova.

Çiygoznıñ ömür arqadaşı, körüşüv episi olıp bir saat devam etkenini ayta.

Biraz ögüden ukrain ombudsmenı Valeriya Lutkovskaya rusiyeli ombudsmen Tatyana Moskalkova ile Qırımda ve qıtaiy Ukrainada apis etilgen Rusiyeniñ ve Ukrainanıñ bazı vatandaşlarını ziyaret etmege añlaşqanları beyan etilgen edi.Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Rus Birligi» firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.

Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG