Link açıqlığı

Rusiye ombudsmeni Nikolayevde Qırımdan çıqqan eki askerni ziyaret etmege niyetli – haber vastaları


Tatyana Moskalkova

Rusiyeniñ insan aqlarından vekâletlisi Tatyana Moskalkova, Ukrain Silâlı quvetleriniñ sabıq askerleri Aleksandr Baranov ve Maksim Odintsovnı Nikolayevde ziyaret etmege niyetli. Bunı Tatyana Moskalkovanıñ matbuat-kâtibi Aleksey Zlovedov TASS agentligine haber etti.

Ukraina Cenüp regionındaki Nikolayev garnizonınıñ arbiy prokuraturası mahkemeden aldın taqiqatnı yekünlep, Ukraina Silâlı quvetleriniñ eki sabıq askeri Aleksandr Baranov ve Maksim Odintsovnıñ qabaat qararlarını mahkemege yolladı.

Evel ukrain ordusında hızmet etken eki askerni «dezertirlikte» ve «devlet hainliginde» qabaatlaylar.

Ukraina havfsızlıq hızmeti Odintsov ve Baranov noyabr 20-de işğal etilgen Qırım ile sıñırdaki «Çonğar» kiriş noqtasında yaqalanğanlarını bildirgen edi. Mahkeme olarnı para berme ihtimali ile eki ayğa qadar apiske aldı. Soñra kefalet aqqı red etilgendir.

Rusiye Mudafaa nazirligi bildirgenine köre, Ukraina havfsızlıq hızmeti Rusiye askerleri olğan Odintsov ve Baranovnı Qırımdan Nikolayev vilâyetine qaçırdı.

Keçende, dekabr 26 künü ukrain ombudsmenı Valeriya Lutkovskaya rusiyeli ombudsmen Tatyana Moskalkova ile Qırımda ve qıtaiy Ukrainada apis etilgen Rusiyeniñ ve Ukrainanıñ bazı vatandaşlarını ziyaret etmege añlaşqanları beyan etilgen edi.

XS
SM
MD
LG