Kreml kontrolündeki Qırım Yuqarı mahkemesi dekabr 21 künü «Hizb ut-Tahrir işi» boyunca qabaatlanğan Uzair ve Teymur Abdullayevlerniñ şikâyetlerini baqtı ve olarnıñ apiste qaldırılması aqqında ilk mahkemeniñ qararını deñişmesiz bıraqtı.
Böylece, Abdullayevler 2017 senesi mart 11 kününe qadar apiste qalacaqlar, dep haber ete Qırım.Aqiqat muhbiri.
Teymur Abdullayevniñ advokatı Emil Kurbedinov «FSB mahsus bölügi» tarafından onıñ müşterisine ve işniñ diger iştirakçilerine qorqotuvlar seslendirilgenini beyan etti.
«Teymur dedi ki, FSB mahsus bölügi olarnı, avtobusta tabanğa yatqızıp, ağaç kibi taşıy. Eger qıbırdasalar, olarğa qarşı küç qullanılacağınen qorqutalar. Taqiqatçı menim köz ögümde Teymurğa dey ki, o skemleden çabik qalqmasın, çünki ballarnen şaqalar fenadır», – dedi Kurbedinov.
Oktâbr 12 künü Qırımda beş musulman ailede tintüvler keçirilgen edi. Tintüvlerden soñ beş qırımtatarı yaqalandı ve Rusiyede yasaq etilgen «Hizb ut-Tahrir» teşkilâtaında iştirak etkenlerinde qabaatlandılar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.
