Rusiye milletler işleri boyunca Federal agentligi (FADN), qıtaiy Ukrainadan Qırımğa kelgen insanlarnı ciddiy nezaretke almaq içün, alınacaq tedbirlerni azırlamağa teklif ete. Bunı FADN monitoring, talil ve tahmin idaresiniñ yolbaşçı muavini Andrey Komissarov bildirdi, dep haber ete TASS.
«Qırımda migratsion rejimi teşkil etilecek vaqıtta, onıñ strategik emiyetini ve qomşu Ukraina ile davalı munasebetlerni köz ögüne almağa kerek. Dekabr 13 künü FSB yolbaşçısı Qırımda ukrain diversion taqımlarnıñ telükesi artqanını beyan etti. Bu munasebetnen, Qırımğa Ukrainadan kelecek insanlarnı mümkün olğanı qadar ciddiy şekilde esapqa almaq ve yarımadada bulunğanlarını taqip etmek içün tedbirler alınmaq kerek», – dedi o.
Avgust 10-da FSB bildirdi ki, avgust 7-ge keçer gecesi «ukrain diversantları» taqımı yaqalandı, olar sanki Qırımda terakt azırlay ekenler. Yevgeniy Panov ve Andrey Zahtey azatlıqtan marum etildiler ve Moskvada «Lefortovo» apishanesinde tutılalar.
10 noyabrde Rusiye Federal telükesizlik hızmeti işğal etilgen Aqyarda noyabr 9 künü sanki «Ukraina mudafaa nazirliginiñ İstihbarat baş idaresine bağlı olğan sabotaj-terroristik taqımınıñ azaları» – Dmitriy Ştıblikov, Aleksey Bessarabov ve Vladimir Dudkayaqalanğanlarını bildirdi.
Ukraina akimiyeti Moskva bergen malümatını inkâr etip, Rusiye mahsus hızmetleri «provokatsiya» yapa, dep bildire.
