Link açıqlığı

Saatnıñ esas haberi

Qırımda «Sudaqlı dört davasınıñ» eki iştirakçisi bergen şikâyetleri baqılacaq


Qırım, Aqmescit
Qırım, Aqmescit

Rusiye kontrol etken Qırım Yuqarı mahkemesi dekabr 15-de «Sudaqlı dört davasınıñ» iştirakçileri Enver Çavuş ve Seytmemet Seytumerovnıñ şikâyet arizalarını baqacaqtır. Bunı qırımlı Lenora Dülber Facebookta bildire.

«Cumaaqşamı künü, 15.12.2016, Qırımnıñ Yuqarı mahkemesinde Çavuş Enver ve Seytumerov Seytmemetniñ şikâyet arizaları baqılacaqtır. Birinci oturış saat 8.15’te, ekincisi 8.30’da olacaqtır. Bayram arfesi balalarğa aqlaycaq sürpriz yapılacağını tüşünmeyim. Sudaq şeeriniñ mahkemesi çıqarğan qararı qalacaqtır, balalar 20 biñ ruble para cezasını tölemege mecbur ola bileler», – dep haber etti Dülber.

Faalniñ aytqanına köre, Alim Muslâdinov ve Ablâkim Ablâkimovnıñ şikâyet arizaları dekabr 22-de saat 15.30’da ve 15.45’te baqılacaqtır.

Oktâbr 27-de Rusiye kontrol etken mahkeme «Sudaqlı dört davasınıñ» bütün şahıslarını qabaatlı tanıp, memuriy cinayet işlegenini ayttı. Olarğa 20 biñ ruble para cezası berildi.

2016 senesi 18 mayıs künü Sudaqlı qırımtatar faalleri maşnalarda qara şeretli qırımtatar milliy bayraqlarınen yürüş keçtiler. Bu içün olarnı mesuliyetlikke celp etmege istediler. Sudaq şeer mahkemesi gençlerniñ areketlerinde iç bir qanun bozuvını körmedi.

Sudaqnıñ şimdiki politsiya yolbaşçısı böyle qararnen razı olmayıp, oña qarşı şikâyet etti.

Rusiye İçki işler nazirliginiñ vekilleri 18 mayıs 2016-da hatıra aktsiyasında iştirak etken aydavcılarnı kütleviy surette yaqalay edi.

Qırım Rusiye tarafından işğal etilgen soñ yarımadada qırımtatarlarnıñ evlerinde, camilerde tintüvler keçirilip başladı, adamlar diniy mensüpligine köre taqip etile, dep qayd ete Meclis temsilcileri ve uquq qoruyıcılar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG