Link açıqlığı

Saatnıñ esas haberi

Qırımnıñ memuriy sıñırında uquq qoruma aktsiyası keçirildi


«Çonğar» kiriş-çıqış noqtası, tasviriy resim
«Çonğar» kiriş-çıqış noqtası, tasviriy resim

Halqara İnsan aqlarınıñ qoruvı Künü munasebeti ile Qırımnıñ memuriy sıñırında «Çonğar» kiriş-çıqış noqtasında «Qırım – uquqsızlıq meydanı» şiarı ile narazılıq aktsiyası keçirildi. Bunı Qırım.Aqiqat muhbiri bildire.

Cemiyet vekilleri ellerinde ukrain ve qırımtatar bayraqlarını, işğal vaqıtında öldürülgen, ğayıp etilgen ve siyasiy sebeplerden apislerge oturtılğan şahıslarnıñ resimlerini ellerinde tutıp, memuriy sıñırğa taba yürüş yaptılar.

«Bügün, bizler insan aqları aqqında söz yürsetkende, biz sıñırğa qadar kelmege qarar aldıq. Bu sıñır artında – uquqsızlıq tarafı. Qırımda insan aqlarını bozğan Rusiyege tesir etmelesi içün, dünya toplulığını celp etmek kerekmiz. Bizim malümatımıza köre, bügünki künde 38 insan siyasiy mabus olaraq apiste otura», – dedi jurnalistlerge Qırımtatar Milliy Meclis azası, Qırımtatar Maaliy Merkeziniñ yolbaşçısı Eskender Bariyev.

Memuriy sıñırda Qırımdaki insan aqları aqqında hatırlattılar (video)
Bekleñiz, lütfen

No media source currently available

0:00 0:01:07 0:00

Kiriş/çıqış nezaret noqtası yanında miting keçirildi. Herson vilâyetinde regional meclis reisi Lenur Lümanov Qırımtatar Milliy Meclisiniñ beyanatını seslendirdi. Kelgenler qarşısında Meclis reisi Eskender Bariyev sözge çıqtı.

Merasim iştirakçileri «Siyasiy mabuslarğa azatlıq!», «Babalarnı ballarına qaytarıñ!», «Qırımnı qaytarıñız!» ve bu kibi diger şiarlanı bağırdılar.

Bundan soñ, toplanğanlar Qırımnıñ grajdanlıq blokadası keçirilgen yerni ziyaret ettiler, ve anda uquq qorçalav areketi aqqında seminar keçirildi ve vesiqalı film numayış etildi.

Halqara İnsan aqlarınıñ qoruvı Künü er sene dekabr 10 künü qayd etile. 1948 senesi bu künü BMT Baş Assambeyası Umumiy insan aqları deklaratsiyasını qabul etken edi. 2014 senesine qadar Aqmescitte bu künü er yıl mitingler keçirilip, qırımtatarlarnıñ, Qırımda tamır halqı olaraq aqlarını tiklemege talap etile edi. Qırım işğal etilgen soñ rus akimiyeti bu mitinglerni keçirmege yasaq etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG