Link açıqlığı

Qırımtatar Milliy Qurultay MSK reisi Zair Smedlâyev, öz menbaalarına atıf etip, dekabr 9 künü Aqyar civarındaki Mamaşay (Orlovka) köyünde bir taqım musulmanlar yaqalanğanlarını bildirdi. Qırım.Aqiqatqa bu malümatnı tasdiqlap, Smedlâyev, cuma namazından soñ bir zümre silâlı insanlar musulmanlarnı yaqalap, üç maşna ile Qaça polis bölügine alıp ketkenini haber etti.

«Bes-belli ki, öz qanunlarını bozup, advokatlar olmadan, olarnı sorğudan keçirip, parmaq izlerini ve DNA talilillerini alımaq kibi «profilaktik tedbirler» ve diger «samimiy subetler» keçirilecektir», – dep yazdı Smedlâyev Facebookta.

O dedi ki, yaqalanğanlarnıñ tam sayısını aytıp olamay, lâkin olar onğa yaqın insan olğanları belli. Bu areketlerni «E» merkezi (Ekstremizmge qarşı küreşniñ FSB merkezi) hadimleri yapmaq mümkün olğanları farz etile.

Bu malümatni advokat Nikolay Polozov ta tasdiqladı, lâkin onıñ bilgenine köre, yaqalanuvlar olmadı – ceryan vesiqaları toldurılmağan edi. Advokat qayd etti ki, «qanunsız şekilde subetler» ötkerildi, insanlar bu subetlerden vazgeçmek mümkün degiller. Musulmanlardan parmaq izlerini aldılar.

«Bunıñ eppisi bir maqsat ile yapıla – qorqutmaq, qorquzmaq, qırımtatarlarnı öz milliy menligi ile birlikte diniy mensüpligini de unuttırmaq», – dedi advokat.

Qırım işğalinden soñ yarımadada mustaqil jurnalistler, qırımtatar faalleri ve Meclis azalarında tintüvler sıqlaştı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG