Lavrov, Rusiyede yaqalanğan ukrainliler deñiştirilmek mümkün olğanlarını tüşüne. Bunı Rusiyeniñ Tışqı işler naziri Sergey Lavrov OSCE nazirler körüşüvi devamında matbuat-konferentsiyasında bildirdi, dep haber «Eurointegration».
Jurnalist, Ukrainalı esirler sırasında olğan Oleg Sentsov, Roman Suşenko ve Stanislav Klıhnıñ azat etilmeleriniñ mümkünligi aqqında sual sorağanda, Lavrov onı izaatladı.
«Bu insanlarğa kelgende, mında adliyeviy imkânlar bardır. Böyle imkânlar Nadejda Savçenko deñiştirilgende qullanıla edi. Ukrain apishanelerinde de Rusiye vatandaşları tutıla», – dedi o.
Bunen beraber Rusiye TİN yolbaşçısı, şu ya da bu esirlerge dair tam tahminlerini seslendirmedi.
2015 senesi avgust 25 künü Rusiyeniñ Şimaliy-Kavkaz okrug arbiy mahkemesi, Aqmescitli ukrain rejissörı Oleg Sentsovnı, terrorizmde qabaatlap, 20 yılğa sert rejim apishanesinde azatlıqtan marum etilecegi aqqında qarar alğan edi.
Ukraina vatandaşı Stanislav Klıh, Çeçenistan Yuqarı mahkemesinde 20 yılğa mahküm etildi. Onı, 1994-1995 seneleri qışta, Rusiye ükümet ordularına qarşı Çeçenistan cenkinde iştirak etip, bir-qaç onluq rus askerini yaralağanında ve öldürgeninde qabaatlap, apiske oturttılar.
Ukrain jurnalisti, «Ukrinform» agentliginiñ Frenkistandaki mahsus muhbiri Roman Suşenko, sentâbr 30 künü Moskvada yaqalanğan edi. O Rusiyege şahsiy işlerinen, soy-sopını ziyaret etmek içün kelgen edi. Rusiye Federal telükesizlik hızmeti onı casuslıqta qabaatlap, onı «Ukraina Mudafaa nazirliginiñ Baş istihbarat idaresiniñ hadimi» olaraq tanıta.
