Avropa monitoring missiyaları işğal olunğan Qırımğa kirip zorluq çeke. Yarımadada kerçek malümatnı toplamaq içün uquq qorçalayıcılar ve közeticiler gizli-gizli kelmege ya da Rusiyeniñ «belli şartlarına uymağa» mecburlar. Bunı dekabr 8-de Qırım insan aqları bağ gruppasınıñ koordinatorı Abdureşit Cepparov Qırım.Aqiqat Radiosınıñ aqşam yayınında ayttı.
«Uquq qorçalayıcılar bizge kelip olamay, kelip çıqsalar da, olarnı taqip etecekler, problemleri peyda olacaq. Uquq qorçalayıcılar mında sıq-sıq gizlep kire, kimsege aytmayıp, kele, çalışa ve qaytalar. Mında olğan eki missiyanı aytacaq olsaq, olarğa belli şartlar qoyula, monitoringniñ manası coyula kete. Bu missiyalarnı ya Rusiyege «kelişken» bir şekilde keçireceksiñ, ya da dünyanı obyektiv sürette haberdar etseñ, tekrar missiya olmaz», – dedi Cepparov.
Cumaaqşamı künü, dekabr 8-de, Ukrainadaki Birleşken Milletler Teşkilâtınıñ insan aqları monitoring missiyasınıñ ekspertleri daa bir esabatını taqdim etti. Vesiqada işğal etilgen Qırımdaki insan aqlarınıñ vaziyetine qıymet kesile. Aqımdaki seneniñ avgust ayından noyabr ayına qadar vaziyet nezaret etilgen.
Maruzanıñ esas mevzusı qırımtatar halqınıñ al-vaziyetine bağışlanğan.
Avropa ekspertleriniñ fikirince, Qırımda soñki eki buçuq yıl devamında «vatandaş serbestligi qısqala», qırımtatarlarnıñ aq-uquqları ise sert bir şekilde bozula.
Rusiyeniñ ekstremizm ile küreş qanunları esasen qırımtatar ealisine qarşı qullanıla, dep aytıla maruzada. Misal olaraq Qırımda Meclis yasağı ve Rusiyede yasaq etilgen, amma dünyanıñ bir çoq memleketinde qanunğa köre areket etken «Hizb ut-Tahrir» teşkilâtı ile bağlarından sebep uydurılğan Rusiye cinaiy işleriniñ artması qayd etile.
Missiyanıñ maruzasında kütleviy haber vastalarınıñ mustaqillik aqqı, toplaşuv ve ifade serbestligi bozulğanı qayd etilmekte. Azlıqlarnıñ aq-uquqları, adaletli mahkeme aqqı, insan aqlarınıñ bozulması ve insanlarnıñ qaçırılması haberlerine diqqat ayırıldı.
