Rusiye Federatsiyasınıñ Kyivteki elçihanesi qarşısında noyabr 25 künü faaller, Qırımda ğayıp etilgen insanlarnıñ tapılmasını talap ettiler. Bunı Qırım.Aqiqat muhbiri bildire.
Aktsiya iştirakçileri rus elçiligi qarşısında, közlerini bağlap turdılar. Olarnıñ sözlerine köre, böyle numayış, rus akimiyeti ğayıp olğanlarınen meraqlanmağanını köstere.
Ukrainada Amnesty International teşkilâtınıñ matbuat-kâtibi Mariya Guriyeva, bu kibi aktsiyalar Rusiye akimiyetiniñ areketsizligi diqqatsız qalmağanını tasdiqlay.
«Qırımnıñ Rusiye akimiyeti yarımadadan tış: qıtaiy Ukrainada ya da halqara seviyede, olğan vaqialarğa istemeyip cevaplana. Olar belleyler, sanki olarnıñ yapqanları gizli qala ve onı kimse körmey. Böyle aktsiyanıñ esas maqsadı – Rusiye akimiyetine, olarnı taqip etkenimizni köstermektir. Olarnıñ şimdi yapqan qanunsızlıqları cezasız qalmaycaq», – dedi Guriyeva.
İşğal etilgen topraqlarnıñ sualleri boyunca Ukrain naziriniñ birinci muavini Yusuf Kurkçi dey ki, bu kibi areketler, Ukrainadakiler yarımadada qalğan vatandşaları içün küreşmege azır olğanlarına köstere.
«Böyle aktsiyalarnen biz, işğal etilgen topraqlarda qalğan Ukraina vatandaşlarına, pervasız qalmağan adamlar bar olğanını kösteremiz, insanlar öz vatandaşlarınıñ aqları içün küreşmege azır olğanını bildiremiz. Bu insanlar öz teşebbüslerinde istiqrarlı ve devamlı olıp areket eteler. Bunı bu aktsiya da tasdiqlay, o Ervin İbragimovnıñ qaçırılğan kününde keçirile», – dedi nazirniñ birinci muavini.
Rusiye Federatsiyasınıñ elçihanesinden, faallernen subetleşmek içün iç bir kimse çıqmadı.
Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».
Farqlı esaplarğa köre, işğal etilgen Qırımda 13 ya da 20 insan belgisiz ğayıp oldı, eñ azından 6 insan ölü tapıldı. Bu munasebetnen Crimea SOS er aynıñ 25 kününde Rusiye elçiligi qarşısında aksiya teşkil ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
