Qırım Muhtar Cumhuriyetiniñ teleradiokompaniyalarına maddiy yardım köstermek qararınıñ qabul etilmesi – qırımtatar yayını içün büyük bir ğalebedir. Bunı noyabr 17-de ATR telekanalınıñ saibi Lenur İslâmov Qırım.Aqiqatqa bergen izaatında ayttı.
«Mence, bu büyük bir ğalebe, devlet ilk sefer qırımtatarlarğa yayın ceetinden yardım etecek. Bu Qırım içün pek müim», – dep ayttı İslâmov.
Onıñ qayd etkenine köre, ATR telekanalı devlet telekompaniyası degil, amma «Ukrainanıñ devlet menfaatlarını köz ögüne alıp areket ete».
Ukraina Yuqarı Radası noyabr 17-de olıp keçken umumiy toplaşuvında Ukraina Nazirler şurasına Qırım Muhtar Cumhuriyeti ve Aqyarnıñ teleradiokompaniyalarına devlet bücetinden maddiy yardım köstermege imkân berecek №5333 qanun leyhasını qabul etti.
Ukraina halq deputatı Refat Çubarov Yuqarı Radada çıqışta bulunıp, 35-36 million grivna maddiy yardım aqqında laf ketkenini aydınlattı.
2015 senesi aprel 1-den başlap ATR qırımtatar telekanalı Rusiye litsenziyasını alamayıp, yarımadada yayınını toqtattı. Soñra ATR telekanalı esas Ukrainağa köçip, yayınlarını devam etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
