Link açıqlığı

«Qırımoğlu» Mustafa Cemilev 73 yaşını toldurdı


Mustafa Cemilev. Arhiv fotoresimi

Qırımtatarlarnıñ milliy lideri Mustafa Cemilev noyabr 13-de 73 yaşını toldurdı. Doğğan kününi Mustafa ağa New Yorkta qayd etecek, o, noyabr 15-de Birleşken Milletler Teşkilâtınıñ Baş assambleyasında Qırım rezolütsiyasınıñ qabul etilmesi içün ukrain eyyetiniñ erkânına kire, dep bildirdi Ukraina haber siyaseti naziriniñ birinci muavini Emine Ceppar Facebook saifesinde.

«Bugün ulu adamnıñ doğğan künü. Oña «Qırımoğlu» deyler. Büyük qızım onıñ dünyanıñ eñ küçlü insanı olğanını bilip, Rusiyede Pütinniñ rejimini yeñip olacağından emin. Bir vaqıtları qartbabam aynısını maña da aytqan edi. O vaqıt Pütin yerinde sovetler bar edi», – dep yazdı Ceppar.

Onıñ aytqanına köre, qırımtatarlar içün Mustafa Cemilev Qırım oğrunda küreşniñ timsali ola.

«Ekinci kere bu aqqı içün küreşe. Arzusı – Qırımğa qaytmaq degil, Qırımnı qaytarmaqtır. Bir şeyge baqmadan, er daim İnsan olıp qala – adiy, açıq ves amimiy. Hayırlı Yaşlar!», – dep yazdı Ceppar Facebookta.

Mustafa Cemilev qırımtatar halqı oğrunda küreşi sayesinde halqınıñ sayğısını ve milliy lider statusını qazanğandır. 1966-1983 seneleri altı kere apiske alınğan edi. Yedi kere mahküm etilgen, «sovetler qurumını aqaretlegen fikirleri içün» 15 yıl apiste yatqan. 1975-1976 seneleri Omsk apishanesinde 303 kün açlıq tutı. 1986 senesi azatlıqqa çıqtı.

1991 senesinden 2013 senesine qadar Qırımtatar Milliy Meclisiniñ reisi edi. Mustafa ağa – III-VII çağırılış Ukraina Yuqarı Radasınıñ halq deputatıdır. Ukraina parlamentinde firqasız qala edi.

2014 senesi avgust 20-de Ukraina prezidenti Petro Poroşenkonıñ №657/2014 buyruğı esasında Ukraina prezidentiniñ qırımtatar halqı işlerinden vekâletlisi vazifesine tayin etilgen.

Mustafa Cemilev Selcuk universitetiniñ (Türkiye) fahriy doktorı, Orlık adına «Ukrain cemiyetiniñ demokratizatsiyası içün» halqara mukâfatnıñ laureatı ola. Nansen (BMT) medali ve V ve IV dereceli Yaroslav Mudrıy ordeninen taqdirlengen.

2016 senesi Cemilev Saharov mukâfatına namzet kösterildi, faqat onı «İslâm devleti» gruppirovkasında qullıq çekken qadınlar ve yezidilerniñ aq-uquqları oğrunda küreşken Nadia Murad ve Lamiya Ayya Başar qazandılar.

XS
SM
MD
LG