Ukraina prezidenti Petro Poroşenko öz Facebook saifesinde qırımtatar halqınıñ lideri Mustafa Cemilevni doğğan künü munasebetinen hayırladı.
«Mustafa Cemilevniñ taqdirine eñ qıyın imtainlar tüştü. Lâkin olar onı yıqmadılar, tek daa sağlam ettiler. Öz halqınıñ kerçek lideri, öz hayatını küreşke berdi. Birlikte biz mıtlaqqa yeñermiz! Doğğan künüñ hayırlı olsun, Mustafa!», – dep yazdı prezident.
Qırımtatarlarnıñ milliy lideri Mustafa Cemilev noyabr 13 künü 73 yaşını tıldurdı. Öz doğğan kününi Mustafa-ağa New-Yorkta qayd etti, anda o ukrain eyyetiniñ terkibinde teşrif buyurıp 15 noyabrde BM Baş Assambleyasında Qırım boyunca rezolütsiyasınıñ qabul etilmesine yardımcı olacaq. Bunı Facebookta Ukraina Haber siyaseti naziriniñ birinci muavini Emine Ceppar bildirdi.
Mustafa Cemilev qırımtatar halqınıñ aqları içün mayışmayıp küreşkeni içün halq arasında itibar qazandı ve milliy lider olaraq tanıldı. 1966-1983 yılları devamında o altı kere apiske atılğan eti. Yedi kere mahküm etildi, «sovet ükümetini aqaretlegen baqışlarnı teşviq etkeni» içün 15 yılğa azatlıqtan marum etildi. 1975-1976 seneleri Omsk apishanesinde 303-künlük açlıq keçirdi. 1986 senesi azat etildi.
1991-2013 seneleri Qırımtatar Milliy Meclisiniñ reisi edi. Mustafa-ağa – Ukraina Yuqarı Radasınıñ III-VII çağıruvlarınıñ millet vekili. 2014 senesi noyabr ayından – VIII çağıruvınıñ Ukraina halq vekili. Bütün vaqıt devamında ukrain parlamentinde o fırqasız olaraq qala edi.
2014 senesi 20 avgust künü ukrain prezidenti Petro Poroşenkonıñ №657/2014 fermanı ile Qırımtatar halqınıñ işleri boyunca Ukraina prezidentiniñ vekili vazifesine tain etildi.
Mustafa Cemilev – Türkiyedeki Selçuk Üniversitesiniñ uquq ilimlerinde fahri doktoru, «Ukrain cemiyetiniñ demokratikleşmesi içün» Orlik adına halqara mukâfatqa nail oldı. Nansen (BM) medali, Yaroslav Mudrıy knâziniñ V ve IV seviye ordenlerinen rağbetlendirildi.
2016 senesi Cemilev Saharov mukâfatına namzet olaraq teklif etilgen edi, lâkin onı, DAİŞ esaretinden qurtulıp, yezidler cemiyeti ve qadılarnıñ aqqları içün küşken Nadia Murad ve Lamiya Aci Başar qazndılar.
