Rusiyeli «İnturist» turistik şirketi Qırımda işini toqtata ve bütün paralarını Türkiyedeki kurortlarğa yatırım ete. Bunı noyabr 11 künü Kremlin nezareti astındaki Qırım Devlet şurasınıñ sanitar-kurort kompleksi ve turizm komitetiniñ toplaşuvında Qırım parlamentiniñ vekili Valeriy Kovalenko bildirdi, dep haber ete «Krıminform».
Onıñ sözlerine köre, Türkiye rusiyeli turistlerni faal siyaset ile celp ete, yerli musafirhaneler içün ve olarnıñ avia-uçuşları içün subsidiyalar kirsete.
«Türkiye kurortları qaçırılğanını oluştıra, şimdi endi öyle oldı ki, atta «İnturist», bizim eñ büyük ortaqlarımızdan biri, kerçekten Qırım bazarından çekildi. Olar bütün paralarını Türkiyege keçireler, çünki mında elverişli degil. Böyle vaziyette biz 2017 sezonına yaqınlaşamız», – beyan etti deputat.
Bundan ögüne sentâbrde Yaltada keçirilgen «Açıq Qırım» forumında Kremlin tarafından tainlengen Qırım yolbaşçısı Sergey Aksönov dedi ki, sanki «Qırım ükümetiniñ esas maqsadı – yarımadanı bütün yıl devamında çalışacaq turistik merkezge çevirmektir».
