Yaltada keçirilgen «Açıq Qırım» turistik forumında Kreml tarafından tayinlengen Qırım yolbaşçısı Sergey Aksönov ilân etti ki, Qırım ükümetiniñ esas maqsadı, yarımadadan bütün sene devamında çalışacaq turistik merkezni yapmaqtır. Bu aqta Aksönov sentâbr 28-de, çarşenbe künü Facebook saifesinde bildirdi.
«Strategik maqsadımız – yarımadadan halqara bütün sene devamında çalışacaq Rusiye turistik merkezini yapmaqtır. 230-dan ziyade Qırım şifahanesi, otel ve musafirhanesi küz-baar mevsiminde çalışmağa azır» – dep qayd etti Aksönov.
Kremlge boysunğan Qırım ükümeti matbuat hızmetiniñ bildirgenine köre, forumnıñ maqsadı – turistik biznes temsilcileri arasında dialog qurmaq, turistik bizneske devletniñ destegi mevzularını açmaq, Qırımnıñ mevsimlerara imkânlarını muzakere etmektir. Bunen beraber, forum çerçivesinde 2017 senesi mevsiminiñ fiyatları taqdim etilecek, dep aytıla beyanatta.
Sergey Aksönov qayd etti ki, merasim neticelerine binaen, Kremlge boysunğan Qırım ükümeti yarımada turistik saası kontseptsiyasını işlemege ve «hatalar boyunca çalışmalarnı alıp barmağa» söz bere.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
