Qırımtatar Milliy Meclis reisi Refat Çubarov «112 Ukraina» telekanalınıñ efirinde Qırımda «ukrain diversantlarınıñ» yaqalanması aqqında nevbetteki haberni izaatladı.
«Men er taraftan, Rusiye FSB vekillerinden de, sesledirilgen beyanatlarnı diqqatnen közettim. Evelleri men «Nomos» cemaat teşkilâtınen işbirlik tuta edim, olar Qara deñiz havuzı ve telükesizlik mevzularında meraqlı taliller azırlay ediler. Bu kene de FSB-niñ uydurğan ğayesi. Men bellesem, bizim devletimizge qarşı Rusiye tarafından nevbetteki haber ücümi azırlanıla, olar uydırdılar ve bu provakatsiyanı kerçekleştiediler. Endi olar bütün dünyağa decekler ki, sanki Ukraina devleti Qırımğa terroristlerni yollay. Bu, Qırımda yaşağan bizim insanlarımını qorqutmaq içün de yapıla», – dedi Çubarov.
İşğal etilgen Aqyarda yaqalanğan Dmitriy Ştıblikov ve Aleksey Bessarabov 2014 senesine qadar «Nomos» merkezinde arbiy ekspertler olaraq çalışa ediler.
10 noyabrde Rusiye Federal telükesizlik hızmeti işğal etilgen Aqyarda noyabr 9 künü sanki «Ukraina mudafaa nazirliginiñ İstihbarat baş idaresine bağlı olğan sabotaj-terroristik taqımınıñ azalarını» yaqalanğanını bildirdi.
Birazdan soñra Ukraina Mudafaa nazirligi bu malümat «uydurma» olğanını bildirdi.
Kremlin nezareti astındaki Aqyarnıñ Lenin rayon mahkemesi Aqyarda yaqalanğan «diversantlarnı» noyabr 10 künü eki ayğa apiske oturttı.
Rusiyeli Ren TV telekanalı «qırımlı diversantlarnıñ» yaqalanmasını köstergen video levhanı numaiş etti.
