Kremlin nezareti astındaki Aqyarnıñ Lenin rayon mahkemesi Aqyarda yaqalanğan «diversantlarnı» noyabr 10 künü eki ayğa apiske oturttı. Bunı «RİA Novosti» agentligi bildire.
«Şeklengenlerniñ üçü de mahkeme qararınen eki ayğa apiske oturtıldı», – dep aytıla bildirüvde.
«Dojd» agentliginiñ malümatına köre, mahkeme toplaşuvı qapalı şekilde keçirildi.
«Soy-soplar mahkeme binası yanında bulunalar. Advokatnı qıdıralar», – dep bildirile.
Rusiye Federal telükesizlik hızmeti işğal etilgen Aqyarda noyabr 9 künü sanki «Ukraina mudafaa nazirliginiñ İstihbarat baş idaresine bağlı olğan sabotaj-terroristik taqımınıñ azalarını» yaqalanğanını bildirdi.
Birazdan soñra Ukraina Mudafaa nazirligi bu malümat «uydurma» olğanını bildirdi.
Rusiye kütleviy haber vastaları, uquq qoruyıcılarğa atıf etip, yaqalanğan «diversantlar» arasında Dmitriy Ştıblikov, Aleksey Bessarabov ve Vladimir Dudko olğanını bildireler. Bu malümat resmiy olaraq şimdilik tasdiqlanmay. Dmitriy Ştıblikovnıñ ağası Aleksey bundan ögüne tuvğanınıñ yaqalanğanını tasdiqlağan edi. Onıñ sözlerine köre, Dmitriynen beraber onıñ ömür arqadaşı da tutılğan edi, lâkin soñra o yiberildi.
