Avropa Birligi noyabr 9 künü öz Resmiy jurnalında işğal etilgen Qırımda Rusiye tarafından keçirilgen qanunsız saylavlar boyunca alğan qararlarını aşkâr etti. Bunı Radio Svoboda bildire.
«Rusiye Federatsiyası işğal etilgen Qırımda ve Aqyarda Devlet Duma saylavlarını keçirgenini köz ögüne alıp, Avropa Birligi altı insannı yaptırımlarğa oğratılğan şahıs ve şirketler cedveline kirsetilmek kerek olğanlarını qabul etti», – dep aytıla vesiqada.
Avropa Birligine kirgen devletlerniñ iqtisadiyat ve maliye nazirleri bundan ögüne işğal astındaki Qırımda faaliyet köstetgen Rusiyeli siyasetçilerge qarşı keñişletilgen sanktsiyalar cedvelini qabul etken ediler. Radio Svobodanıñ öz muhbiri haber etkeni kibi, Brükselde işğal etilgen Qırımdan Rusiyeniñ Devlet Dumasına, parlamentniñ aşağı palatasına, saylanılğan altı insan aqqında söz yürsetile.
«AB Şurası iqtisadiy ve maliy sualler boyunca bu cedvelge yañı maddeler qoşıp, Ukrainanıñ mustaqilligi ve topraq bütünligine ücüm etüv areketlerinen bağlı yaptırımlar kirsetti», – dep bildirdi AB Şurasında reislik Yapqan Slovakiyanıñ Maliye naziri Peter Kažimír.
Episi olıp, Moskva Rusiye Devlet Dumasına Qırımdan ve Aqyardan sekiz millet vekili saylanılğanını esaplay: dörtü bir mandatlı bölümlerde (üçü Qırım Muhtar Cumhuriyeti ve biri Aqyarda yerleşe) ve daa dörtü üküm sürgen «Yedinaya Rossiya» firqasınıñ umumiy cedvelinden. Olardan ekisi sanktsiyalar cedveline endi kire ediler, altısı bügün kirsetildi.
Avropa Birligi, dünyanıñ ekseri devletleri kibi, Qırımda ve Aqyarda keçirilgen Devlet Duma saylavlarını, ve Rusiyeniñ işğal etilgen Qırımğa saip çıqmaq ıntıluvlarını qabul etmey.
Avropa Birligi, AQŞ, «Gruppadaki yedi» devletleri ve bazı diger memleketler – birlikte, 2014 senesinden başlap, Rusiyege qarşı bir sıra sanktsiyalar qullandı. Bu yaptırımlar Rusiyeniñ Ukrainağa qarşı Qırımda ve soñra Donbassta da yapqan tecavuzlarından sebep qabul etildiler. Sanktsiyalar cedveline rusiyeli şahıslar ve şirketler, Qırımdaki ve Donbastaki separatistler, Ukrainanıñ sabıq akimiyet vekilleri kirsetildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
