«Taygan» Qırımnıñ habarcılıq ile küreş cebesi» cemaat teşkilâtınıñ reis muavini, «Qırımda özüni teşkil etüv» cemaat fondunıñ reberi Aleksandr Zabara noyabr 3-de «Halq birligi kününde» Rusiye ve Qırım mekteplerine başlanğıç arbiy azırlıq dersini qaytarmaq kerek, dep ayttı.
«Büyük ve orta nesiller mektepte olğan başlanğıç arbiy azırlıq derslerini yahşı hatırlay. Bu ders sayesinde erkekler ve qızlar başlanğın arbiy azırlıq ile tanış edi. Mektepte vatanperverlik böyle aşlanmalı», – dep izaatladı vaziyetni Qırım.Aqiqat mühbirine Aleksandr Zabara.
Cemaat faaliniñ fikirince, Qırımda vatanperverlik qomşu Rusiyege köre alçaq seviyededir.
«Al-azırda mekteplerge dersten tış faaliyet çoq berile, anda pek faydalı dersler añlatılmay. Arbiy azırlıq yoq, bunı tüzetmek kerek», – dep qayd etti Rusiyege qoltutqan faal.
Cemaat faali bildirgenine köre, ğaye ömürge keçirilsin dep, elinden kelgenini yapacaq.
Aleksandr Zabara Qırımda «rus areketiniñ» faali olaraq belli, Qarasuvbazar rayon şurasınıñ reis muavini olıp çalıştı, soñra Qarasuvbazar rayonınıñ ihtiyarları ve saqatlarına içtimaiy hızmet merkeziniñ müdiri edi.
Rusiyeniñ arbiy şeref künü – Halq birligi künü Rusiyede er yıl noyabr 4-de, 2005 senesinden berli qayd etile. Bu bayram Rusiye tarihında müim bir künge bağışlana – 1612 senesi Moskva leh küreşçilerinden azat etilgen edi.
Qırımda bu kün Rusiyeniñ yarımada işğalinden soñ qayd etilmege başladı. Bugün, noyabr 4-de, Halq birligi künü munasebetiniñ Qırım şeerlerinde bayram yürüşleri keçirilecek, Aqmescitte saat 12-ge qadar naqliyat areketi sıñırlandı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
