Kreml kontrol etken yarımada akimiyeti diger dinlerni kütken vatandaşlarğa menfiy munasebet şekillendire. O, Rusiye Anayasasını bozıp, tek bir dinge qoltuta. Bunı Qırımtatar Milliy Qurultayı Merkeziy saylav komissiyasınıñ reisi Zair Smedlâyev Qırım.Aqiqat Radiosınıñ saba yayınında bildirdi.
«(Qırımtatarlar – QA) toplu yaşağan yerlerde bile yalıñız bir dinniñ timsalleri tiklene. Musulmannıñ evi yanında ya da azbarında haç tiklengen soñ yarımadada dinlerara barışıq pekitile, dep aytılsa, – bu tam bir yalan», – dep ayttı o Zaur Smirnovnıñ Aqmescitte Cuma-Cami qurucılığınıñ açılışında yapqan çıqışını izaatlap.
Rusiye kontrol etken Qırım milletlerara munasebetler ve sürgün olunğan vatandaşlarnıñ işleri boyunca devlet komitetiniñ reisi Zaur Smirnov Aqmescitte Cuma-Cami qurucılığı başlağanda dedi ki, «Qırımnıñ milletlerara ve dinlerara barışıq regionı olaraq büyük kelecegi bar. Ukraina vaqtında Qırım musulmanlarını ealiniñ diger qısmına qarşı qoymağa tırışqan olsalar, bugün Qırım halqları büyük bir qoranta olaraq yaşay, bir-biriniñ ananeleri ve medeniyetini ürmet eteler. Qırım ealisi maneviy olaraq bir. Bizni birleştirgen qıymetlerimiz arttı».
Qırım kütleviy haber vastaları bildirgenine köre, Aqmescitte Cuma-Caminiñ temeli qoyuldı. Tedbirde Kreml kontrol etken Qırım ükümeti, parlamentiniñ vekilleri, şeer akimiyeti ve müftiylik iştirak ettiler, dep haber ete «RİA Novosti Krım».
Qırımnıñ milletlerara munasebetler ve sürgün olunğan vatandaşlarnıñ işleri boyunca komitetiniñ Rusiye yolbaşçısı Zaur Smirnov temel qoyulğanını bildirdi. Qırımdaki Cuma-Cami qurucılığı 2015 senesi sentâbr 25-de başladı. Kreml kontrol etken yarımada akimiyeti qurucılıq 3 yıl devam etecegini bildirgen edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
