Aqmescitte Cuma-Caminiñ temeli degil, Qırım müftiyligi binasınıñ temeli qoyuldı. Yarımadanıñ Kremlge boysunğan akimiyeti bunı cemaattan gizleycek ola. Bunı noyabr 3-de Qırım.Aqiqat Radiosınıñ saba yayınında Qırımtatar Milliy Qurultayı Merkeziy saylav komissiyasınıñ yolbaşçısı Zair Smedlâyev ayttı.
«Bu tantanalı açılışqa kontrol etilmegen matbuat vastaları alınmadı. Anda (Aqmescitte – QA) cami temeli degil, müftiylik yerleşecek memuriy binanıñ temeli qoyuldı. Bunı kimse aytmasın dep, bir kimsege kirmege bermediler», – dedi o.
Aqmescit Cuma-Camisiniñ qurucılığı sozulacaq, çünki Kreml kontrol etken işğalci yarımada akimiyeti içün müim bir obyekt degildir. Böyle bir fikirni Qırım.Aqiqat Radiosınıñ saba yayınında «Umma» Ukraina musulmanları diniy idaresiniñ müftisi Said İsmagilov paylaştı.
«Rusiye akimiyeti Cuma-Caminiñ qurucılığına, misal olaraq, keçit (Keriç keçiti – QA) qurucılığına ayırğa paradan ziyade berecek ya da evelce berecegine şübelenem. Keçit – imic meselesidir, qırımlılarğa olarnı hatırlaylar, seveler, tüşüneler dep köstermek içün yapıla, cami ise – musulmanlarnıñ işidir», – dep ayttı İsmagilov.
Qırım kütleviy haber vastaları bildirgenine köre, Aqmescitte Cuma-Caminiñ temeli qoyuldı. Tedbirde Kreml kontrol etken Qırım ükümeti, parlamentiniñ vekilleri, şeer akimiyeti ve müftiylik iştirak ettiler, dep haber ete «RİA Novosti Krım».
Qırımnıñ milletlerara munasebetler ve sürgün olunğan vatandaşlarnıñ işleri boyunca komitetiniñ Rusiye yolbaşçısı Zaur Smirnov temel qoyulğanını bildirdi. Qırımdaki Cuma-Cami qurucılığı 2015 senesi sentâbr 25-de başladı. Kreml kontrol etken yarımada akimiyeti qurucılıq 3 yıl devam etecegini bildirgen edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
