Link açıqlığı

Qırımtatar halqınıñ lideri Mustafa Cemilevniñ dekabr 14-de Moskva mahkemesiniñ oturışına daveti «siyasiy mısqılğa» oşay. Cemilev Moskvadaki mahkeme oturışına barıp olamaycaq, çünki Rusiyege kirişiniñ yasaq etilmesi baqıla. Bunı Cemilevniñ advokatı Mark Feygin Qırım.Aqiqatqa bildirdi.

«Yasaq qala, belli bir cedvelde olğanından Rusiyege kelip olamaz. Rusiye Federal havfsızlıq hızmetiniñ yasağından şikâyet etecekmiz. Birinci mahkemede Mustafa Cemilev kelsin ve mahkemede iştirak etsin dep, muracaat etken edi. Rusiye şeer mahkemesi Memuriy mahkeme işleri kodeksine köre bunı red etti. Cemilevge Rusiyede haber olaraq tanılğan telegramma yollanıldı, amma onıñ vaqtınca kirişine izin berecek qarar yoq», – dep ayta Feygin.

Advokatnıñ fikirince, dekabr 14-de mahkeme birinci qararnı deñiştirmeycek. Böylece, Avropa insan aqları mahkemesine muracaat etmek mümkün, dep qayd ete Cemilevni advokatı.

2016 senesi noyabr 1-de Ukraina prezidentiniñ qırımtatar halqı işlerinden vekâletlisi dekabr ortasında Moskvanıñ Rusiye Yuqarı mahkemesinde onıñ şikâyet arizası baqılacağına dair haber aldı.

2014 senesi mayıs 3-de Qırım ile memuriy sıñırda Ermeni Bazar şeeriniñ nezaret-kiriş noqtasında Rusiye sıñırcıları Rusiye Federal havfsızlıq hızmetiniñ 2014 senesi aprel 19-de işğal etilgen yarımadağa kirişini beş yılğa qadar yasaq etmek qararına esaslanıp, Mustafa Cemilevni yarımadağa almadılar.

2015 senesi fevral ayında Moskvanıñ Basman mahkemesi qırımtatarlarnıñ lideri Mustafa Cemilevniñ Rusiyege kirişini yasaq etme qararı qanunğa uyğun, dep üküm çıqardı.

XS
SM
MD
LG