Link açıqlığı

Ukraina jurnalistleri milliy birliginiñ (UJMB) İgor Lubçenko ifade serbestligini qorçalav premiyasınıñ laureatı Qırım jurnalisti Nikolay Semena oldı. Bunı noyabr 2-de Facebookta UJMB birinci kâtibi Sergey Tomilenko bildirdi.

«Bu sene UJMB İgor Lubçenko ifade serbestligini qorçalav premiyasınıñ laureatı – Qırım zenaatdaşımız Nikolay Semena! Nikolay, sabır etiñiz!», – dep yazdı Tomilenko.

UJMB saytında aytıla ki, İgor Lubçenko adına ifade serbestligi qorçalav mukâfatı endi beşinci kere berille. Laureatnı Birligi noyabr 3 – UJMB reisi İgor Lubçenkonıñ (1937-2012) doğğan künü – arfesinde ilân ete. Mukâfatnıñ ilk laureatı jurnalist etikası komissiyasınıñ reisi, «Zerkalo nedeli» gazetasınıñ tesisçisi Vladimir Mostovoy oldı, ekinci mukâfatnı «Telekritika» (şimdiki – OO «Detektor media») leyhasınıñ reberi Natalya Ligaçeva aldı, 2014 senesi UJMB Donetsk vilâyeti teşkilâtınıñ reisi Aleksandr Brıja mukâfatnı qazanğan edi, keçken sene ise – Poloniya jurnalistleri birliginiñ reisi Agneşka Romaşevskaya-Güji.

Bundan evel Semena Ukrain PEN-merkeziniñ (Ukrainian Center of International PEN Club) azası oldı.

Ukraina haber siyaseti naziri Yuriy Stets oktâbr 10-da Radio Svoboda muarririyetine prezident Petro Poroşenko Radio Svoboda ve Qırım.Aqiqat müellifi Nikolay Semenağa bergen «Ukraina mustaqilliginiñ 25 yıllığı» medalini berdi.

Baarde Qırımda Qırım.Aqiqat ile işbirliginde şeklengen jurnalistlerniñ evlerinde tintüvler olıp keçti. Radio Svoboda müellifi Nikolay Semenağa qarşı Rusiye Federatsiyasınıñ topraq bütünligini bozmaq çağıruvları şeklenmesi ile cinaiy iş açıldı. Rusiye taqiqatı oña yarımadanı terk etmege yasaq etti.

Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağırdı.

Avgust 23-de Nikolay Semenanıñ advokatları FSBge muracaat etip, onı Qırımdan tedaviylenmesi içün yibermege çağırdı.

Bundan evel Halqara ve Avropa jurnalistleri Federatsiyası, em de OSCE ifade serbestligi meseleleri Temsilcisiniñ ofisi Rusiye akimiyetinden Nikolay Semenanı Kyivge yibermege rica etken ediler.

Rusiye FSB Qırım idaresi Qırım jurnalisti Nikolay Semenağa Kyivge barıp tedaviylenmege izin bermedi.

XS
SM
MD
LG