Kremlin nezareti astındaki Qırım akimiyeti Qarasuvbazar rayonında Kökey (Rusakovka) köyünde 50 kare metr meydalıqta topraq damartısını közy şurasına daimiy qullanuvğa ayırdı. Bunı oktâbr 31 künü Rusiyeniñ kontrolündeki Qırım Mal ve topraq muameleleri nazirliginiñ matbuat hızmeti bildirdi.
«Bu qarar Rusakovka köy şurasına, kadastr işlerini keçirip, topraq damartısını daimiy qullanuv içün ayırmağa imkân berecek», – dep qayd eteler nazirlikte.
Mal nazirliginiñ malümatına köre, Qarasuvbazar rayonında Rusakovka köyündeki bu damartı mesken yerden tış yerleşken. O yerde diniy inşa – temenna haçı yerleştirilecek.
Aqmescit-Kefe anayolunda, sentâbr 26 künü saba, ekseriyetinen qırımtatarları yaşağan Boğurça qasabası yanında ortodoks hristianlarınıñ haçı yerleştirilgen edi.
Bundan evel kazak cemiyetleriniñ teşebbüsi ile yarımadada onlarca ibadet etilecek haçlar tiklenildi. Farqlı yıllarda, 2000 senesinden başlap, bu, diger dinler temsilcileri tarafından narazılıqnıñ peyda olmasına sebep olğan.
2014 senesi avgust ayında, işğalden yarım yıl keçken soñ, haç Bağçasaray rayonındaki Tav Badraq (Skalistoye) köyünde yol kenarında peyda oldı, evel o yerde, qırımtatarlarnıñ fikrince, eski qırımtatar mezarlığı bar edi. 2015 senesi oktabr ayında eñ büyük, yüksekligi 7 metr, ağırlığı 6 tonna olğan haç Nikolayevka kirişinde qoyuldı. 2016 senesi aprel ayında ibadet etilecek haç Sudaqta, mayıs ayında ise, birden üç haç Aqmescitniñ Yalta tarafından kirişinde, Eski Orda (Lozovoye) ve Anğarada (Perevalnoye) tiklenildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
