Qırımtatar Milliy Meclisiniñ reisi Refat Çubarov, Jenevadaki Parlamentlerara İttifağı Assambleyasınıñ 135-inci cemaat munaqaşalarında çıqışta bulunıp, Rusiye halqara uquqqa qaytqanına qadar dünya toplulığını Assambleyanıñ nevbetteki toplaşuvını bu memlekette keçirmemege çağırdı. Bunı QHA bildire.
Çubarov 2014 senesi Rusiye parlamenti qabul etken qararlarnıñ aqibetlerini ayttı. O vaqıt Rusiye Devlet duması prezident Putinge Ukrainada Rusiye ordusını qullanmağa izin bergen edi.
«Vaqtınca işğal olunğan Qırımda qırımtatar halqı – yarımadanıñ tamır halqı – esir alındı. İşğalciler Meclisni yasaq etti, onıñ azaları ise taqip etile. 22 qırımtatarı, şu cümleden yardımcım Ahtem Çiygoş, uzun müddet devamında qanunsız alda Qırım SİZOsında yata. Yigirmige yaqın genç qırımtatarı qaçırıldı. Bazıları ölü tapıldı, qalğanlar aqqında bir haber yoq. Qırımdaki müminler repressiyalarnıñ qurbanları ola (…) Rusiye halqara uquq qaidelerine qaytqanına ve Parlamentlerara İttifağınıñ yüksek esaslarına uyğanına qadar PAB Assambleyasınıñ toplaşuvı Sankt-Peterburgda keçirilemez, buña diqqatnı celp etmek isteymiz», – dep ayttı Çubarov.
Qırımtatar cemaat erbapları ve faalleri oktâbr 26-da Yaltadaki forumda Rusiye prezidenti Vladimir Putinge teşekkürlerini bildirgen İbraim Şirinniñ aytqanlarını takih etti. Oktâbr 26-da işğal altındaki Yaltada Umumrusiye halq cebesiniñ «Areketler forumı. Qırım» adlı forumda qırımtatarı İbraim Şirin Vladimir Putinge muracaat etip, Rusiye prezidentini Hıdırlez qırımtatar bayramna davet etti.
Şirinniñ aytqanına köre, «Qırım Rusiyege qoşulğan soñ» qırımtatarlarnıñ vaziyeti eyileşti – «matbuat vastaları inkişaf etmege başladı, «Millet» kanalı peysa oldı, mektepte qırımtatar tilinde tasil almaq mümkün».
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
