İşğal olunğan Qırımda ğayıp olğanlarğa destek bildirmek maqsadınen Kyivde Rusiye elçiligi qarşısında er ay keçirilgen aktsiya oktâbr 25 künü ondan ziyade kütleviy haber vastasını celp etti. Bu sefer faaller sanalaştırma vastasınen Qırımda qaçırılğan Ervin İbragimovnıñ ailesi nasıl yaşağanını kösterdiler, dep bildire Qırım.Aqiqat muhbiri.
Ev halatında ana ve susıp oturğan baba saba qavesini içeler, eslerinden oğulları aqqında fikirler çıqmay, böylece ende beş ay devam ete. Ğayıp olğanından soñ onıñ aqqında iç bir şey belli degil. Kyivniñ soqağında oktâbrniñ suvuq avasında böyle sana daa hucur körünedir, lâkin tedbirniñ maqsadı tamam bu edi – cemaatnıñ diqqatını celp etmek, dep añlata teşkilâtçılardan biri, «Crimea SOS» teşebbüsiniñ idarecisi Tamila Taşeva.
«Bizler bu aktsiyağa daa çoq timsaliy mana beremiz. Eñ azından ayda bir kere biz bütün ukrainlilerge, bütün halqara ortaqlarımızğa, diger memleketlerdeki insanlarğa ve, ilk evelâ, Qırımda yaşağan insanlarğa, biz yarımadadaki mecburiy qaçıruvlar aqqında unutmağanımıznı bildirmek kerekmiz. Apis etilgenlerge ne olğanını ögrenip olsaq ta, bu insanlarğa ne olğanını biz iç bir şey bilmeymiz, ğayıp olğanlardan iç biri boyunca taqiqatlar alıp barılmay», – dedi Taşeva.
Bu sefer aktsiyanı Amnesty International halqara uquq qorçalayıcı teşkilâtınıñ vekilleri de qoşuldı.
«İnsanlarnıñ böyle aktsiyalarğa qoşulmaları ğayet müim, çünki ancaq cemaat basqısı, insanlarnıñ devamlı areketleri Qırımda yer alğan vaziyetke tesir etmek mumkün. Bizim vazifemiz – bu meseleni daima kün terkibinde tutmaq, onıñ aqqında ne siyasetçile, ne de Ukraina vatandaşları, ne de dünya toplulığı unutmasın», – dedi Ukrainadaki Amnesty International temsilcisi Mariya Guryeva.
Keçenleri Ervin İbragimovnıñ anası Ukraina prezidentiniñ adına mektüp yazdı. Onda o Poroşenkonı daa çoq ğayret ile onıñ oğlunı qıdırmağa rica ete. Taşevanıñ sözlerine köre, mektüpke açıq cevap daa berilmedi, lâkin şahsiy subetlerniñ ötkerimesi mumkün.
Dünya qırımtatar kongressi icra şurasınıñ azası Ervin İbragimov 2016 senesi mayıs 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.
Rusiyege boysunğan sabıq Qırım prokurorı Natalya Poklonskaya qayd ete ki, yarımadada 357 insannıñ bulunma yeri belgilenmegen, olardan 188 kişi belgisiz ğayıp oldı ve 169 adamnıñ soy-soplarınen bağı üzüldi. Qayd etilgen raqamdan 26 insan – qırımtatardır.
Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».
Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.
