Link açıqlığı

«Çiygoznıñ işinde» zarar körgenler qabaatlanğannı körmegenlerini ayttılar – advokat


Arhiv resimi. Advokat Nikolay Polozov

Qırımtatar Milliy Meclis reisiniñ müavini Ahtem Çiygoznıñ işi boyunca nevbetteki mahkeme toplaşuvında oktâbr 18 künü zarar körgenler olaraq keçken eki insan sorğu devamında qabaatlanğannı körmegenleri aqqında aytılar.

Bunı Qurultaynıñ Merkeziy Saylav Komissiyasınıñ reisi Zair Smedlâyev tarafından Facebookta yerleştirilgen videoda Çiygoznıñ advokatı Nikolay Polozov ayttı.

«Öyleden evel mahkeme eki zarar körgen insannı sorğudan keçirdi. Fevral 26 künü Postnıy soyadı ile öldürilgen adamnıñ ögey anasını birinci olaraq soraştırdılar. Fevral 26 künü olğan vaqialar aqqında o bir türlü malümat berip olamadı. Ölmezden ögne bir aydan ziyade onıñ ögey oğlı horantada yaşamadı. Onıñ sözlerine köre, oğlı Aqmescitke ketip rialtor agentliginde çalıştı. QMC Yuqarı Şurası yanında o dostu ile bulunğan eken. Dostunıñ adını ise ögey ana bildirmedi», – ayta Polozov mezkür videoda.

Advokatnıñ bildirgenine köre, ekinci olaraq «narodnoye opolçeniye» iştirakçisi İvkinni soraştırdılar.

«İvkinniñ sözlerine köre, fevral 25 künü o «narodnoye opolçeniye»ge yazıldı. Zarar körgenlerden o QMC Yuqarı Şurası yanındaki vaqıyalar zamanında Rus vatandaşı olğan ekinci kişi sayıla, diger soraştırılğan zarar körgenler Ukrain vatandaşları ola», – dedi Polozov.

Advokatnıñ aytqanına köre, zarar körgen adam Ahtem Çiygoznı körmedi.

«İvkin Rusiye tarafdarlarınıñ mitinginde iştirak etkeni aqqında tarif etti. Onı bir qaç kere yumruqnen yüzüne ve tayaqnen başına urdılar. Qalabalıq başlanğanda o yıqıldı, amma ayaq üstüne köterilip oldı. Neticede qarşıdakilerniñ arasında oğradı», – qoştı advokat.

Zarar körgenniñ sözlerine köre, o vaqıt o qarşı kimse eziyet etmedi.

«Yuqarı Şura binasına kirgenler aqqında zarar körgen adam bir şey aytıp olamadı. Onıñ sözlerine köre, qarşıdakiler tertipnen areket ete ediler, amma kim emir bergenini bilmey», – dep yekünledi Polozov.

«Çiygoznıñ işi» Rusiye mahkemesinde «Fevral 26 işi» çerçevesinde baqıla. Amma 20 iyülde mahkemeniñ qapalı toplaşuvında bu iş ekige bölünilgen edi: ayırda - Qırımtatar Milliy Meclis reisiniñ muavini Ahtem Çiygoznıñ işi, ve ayırda – Ali Asanov ve Mustafa Degermenci.

Ukrainı Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.

XS
SM
MD
LG