Qırımda oktâbr 17 künü, keç aqşam Rusiye kontrolü astındaki Aqmescit Merkeziy rayon mahkemesi «26 fevral» işi boyunca azırlıq toplaşuvını keçirdi. Toplaşuvda alınğan qarar aqqında Facebookta Qırımtatar Milliy Qurultayınıñ MSK reisi Zair Smedlâyev haber etti.
«Yançıq Aqmescit ş. Merkeziy rayon mahkemesi «26 fevral» olaraq adlanğan iş boyunca azırlıq toplaşuvını bitirdi. Bu cinaiy işte Ahtem Çiygoz aqqında ayrı ayrı iş açıldı, o Qırımnıñ Yuqarı mahkemesinde baqıla. Bu işte keçken diger qabaatlanğanlar: Ali Asanov, Mustafa Degirmenci, Eskender Kantemirov, Eskender Emirvaliyev ve Arsen Yunusovnı Merkeziy rayon mahkemesinde mahküm etip başladılar. Yarın, oktâbr 18 künü saat 9.30 Pavlenko, 2 adresi boyunca Ahtem Çiygoznıñ nevbetteki mahkeme oturışı keçirilecek, qalğan iştirakçiler boyunca mahkeme saat 13.00, Turetskaya soq., 21 adresinde», – dep haber etti Smedlâyev.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Ukrainı Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
