Rusiye işğal etken Qırımda «Haytarma» Devlet qırımtatar oyun ve yır ansambliniñ artistlerini toqtamayıp işten boşatalar. Bunı Qırımtatar Milliy Meclisiniñ azası, Qırımtatar maaliy merkeziniñ idare yolbaşçısı Eskender Bariyev Facebook saifesinde bildirdi.
Bariyevniñ aytqanına köre, qırımtatar sürgünliginden soñ «Haytarma» ansambli 1957 senesi Taşkentte yañıdan canlandırılıp, qırımtatar medeniyetiniñ ayırılmaz bir parçası ola.
«Sürgünlik vaqtında ansambl er bir qırımtatarı içün kimlik, medeniyet ve til yutumı edi. 1992 senesi kene Qırım devlet filarmoniyasına avuştırıldı. 1993 senesinden başlap ansambl Qırım filarmoniyasınıñ Kezlev bölüginde çalışa», – dep yazdı Meclis azası.
Eskender Bariyev qayd etti ki, «Haytarma» ansamblinde 33 artist bar. 2016 senesi iyün ayında ansamblniñ bediiy reberi vazifesinden Tacikistannıñ halq artisti Remziye Tarsinova-Bakkal çıqarıldı. Soñra oyuncı Rustem Yusupov «Qırım» ansambline keçmege mecbur oldı.
«Rusiye qanunlarına köre, artistler añlaşma esasında çalışa. Tatilge çıqmazdan evel artistler añlaşma müddeti bitkeninden işten ayırılma arizasını yazdılar. Tatilden soñ yañı añlaşma tizilecek edi, amma 10 artist işten boşatılğanını ögrendi», – dep yazdı Bariyev.
Kremlge boysunğan Qırım Medeniyet nazirligi bu malümatnı şimdilik izaatlamay.
Bundan evel Qırımnıñ Bağçasaray rayonındaki köylerden birinde qırımtatar oyun taqımınıñ balalarına sanağa milliy tamğalı urbada çıqmağa izin berilmedi. Olar kölmeklerni başqa taraftan kiyip, Alma-Tarhan (Vilino) köy kününde oynamağa mecbur oldılar. Bunı Qırımtatar Milliy Meclisiniñ reis muavini İlmi Ümerov Facebook saifesinde yazdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
