Qırım insan aqları bağ gruppasınıñ azaları, advokat Edem Semedlâyev ve zenaatdaşı Emil Kürbedinov, Aqmescit rayonında yaqalanğan musulmanlarnı qorçalaycaq olalar. Bunı advokat Edem Semedlâyev Qırım.Aqiqatqa bildirdi.
«Tünevin Qırımda beş qırımtatarı yaqalandı. Ekisiniñ añlaşma boyunca advokatı bar, üçüniñ tayin etilgen advokatları mevcut. Al-azırda advokatlarnı qıdıramız», – dep ayttı Semedlâyev.
Advokatnıñ aytqanına köre, olar öz zenaatdaşlarını yaqalanğanlarnıñ soy-soplarına tevsiye etecek olalar.
«Müşterim Cemadinov Emil Rusiye Anayasasınıñ 51-inci maddesine esaslanıp, bir de bir malümat bermey, çünki taqiqatnıñ onıñ qabaatını isbatlaycaq delillerini bilmey», – dep bildirdi Qırım.Aqiqatqa Edem Semedlâyev.
Emil Kürbedinov Teymur Abdullayevniñ menfaatlarını temsil etmek niyetinde. Onı Rusiye Ceza kodeksiniñ eñ ağır 205.5 maddesiniñ 1-inci qısmı boyunca qabaatlaylar. Abdullayev terrorist bölüginiñ teşkil etmesi ile qabaatlana.
Qırımda oktâbr 12-de beş musulman qorantasınıñ evinde tintüv keçirildi. Beş erkek yaqalandı: Rustem İsmailov, Uzair Abdullayev, Teymur Abdullayev, Emil Cemadinov, Ayder Saledinov.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
