Aqmescitniñ Kiyev rayonı mahkemesinde cumaaqşamı künü, oktâbr 13-de, oktâbr 12-de yaqalanğan musulmanlardan biri – Teymur Abdullayevniñ – mahkemesi başladı.
Bunı Abdullayevniñ toplaşuvğa kelgen köydeşi Facebookta bildirdi.
«Yer yoq dep, Teymur Abdullayevniñ mahkemesine yalıñız üç soyu alındı. Bekleme zalında 50-den ziyade insan toplaştı», – dep bildirdi o.
Oktâbr 12-de yaqalanğan qırımtatarlarnıñ advokatı Edem Semedlâyev Facebookta bildirdi ki, mahkeme toplaşuvına kütleviy haber vastalarına kirmege izin berildi.
«Tünevin yaqalanğan qırımtatar musulmanlarına qoltutmağa kelgen bir çoq insan toplaştı. Toplaşuvğa tek matbuat vastaları alındı», – dep yazdı Semedlâyev.
Qırımda çarşenbe künü, oktâbr 12-de, qırımtatarlarnıñ evlerinde tintüvler olıp keçti. Qırımtatarlarnıñ advokatları ve Rusiye kütleviy haber vastaları beş tintüv aqqında bildirdiler.
Qırım siyasetşınası Yeleonora Dülber Facebook saifesinde oktâbt 12-de sabadan Rusiye uquq qoruyıcıları kelgen insanlarnıñ adlarını ve yaşağan yerlerini yazdı.
«Tintüv keçirilgen qırımtatarlar cedveli: Rustem İsmailov, 32 yaşında, Boğurça (Kamenka), Abdullayev Uzair, 42 yaşında, Mamaq (Strogonovka), Abdullayev Teymur, 41 yaşında, Mamaq (Strogonovka), Cemadenov Emil, Saledinov Ayder», – dep bildirdi Dülber.
Qırım advokatı Emil Kürbedinov bildirdi ki, Qırımda yaqalanğanlar «terrorizm maddesi» boyunca şeklene.
«Timur Abdullayev 205.5 maddesiniñ 1-inci qısmı boyunca qabaatlana, Üzeir Abdullayev, Rustem İsmailov, Ayder Saledinov ve Emil Cemadenovnı 205.5 maddesiniñ 2-nci qısmı boyunca qabaat berile», – dep ayttı advokat.
Qırım jurnalisti Lilâ Bucurova Facebookta bildirdi ki, «Bizim balalar» cemaat areketi oktâbr 12-de Qırımda yaqalanğanlarnıñ balalarını baqacaq.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
