Rusiyeniñ federal bücetinde işğal etilgen Qırım içün belgilengen masraflarnı 23 milliard rublege eksiltecekler.
«Argumentı nedeli – Krım» haber etkeni kibi, bunı Rusiye Maliye nazirligi tarafından açıqlanğan bücet deñişmeleri aqqında qanun leyhasından añlamağa mumkün.
«Eñ çoq para bücetniñ yatırım ve içtimaiy leyhalarınen bağlı maddeleri coyacaqtır. Qırımnıñ 2020 senesine qadar içtimaiy-iqtisadiy inkişaf programması 15,6% eksilecektir, bu ise 23 milliard rubledir», – dep aytıla beyanatta.
Eñ büyük qısqartmalar, kütleviy haber vastalarınıñ malümatlarına köre, Kaliningrad vilâyetinde yapılacaqtır. Mında 58%, yani 40 milliard ruble azca berilecektir.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
