İşğal etilgen Qırımda siyasiy repressiyalar tahminen beş biñ qırımtatar faaliyetçisine toqunmaq mumkün. Böyle fikirni İnsan aqları boyunca Qırım kontakt gruppasınıñ idarecisi Abdureşit Cepparov seslendire.
«Beş biñge yaqın insan Qırımda Meclis sistemasınıñ çeşit seviyelerinde ve onıñ etrafında çalışa edi, bu sırada Qurultay azaları ve digerleri de bar», – dedi Abdureşit Cepparov Meclisniñ yasaqlanmasından soñ ola bilecek aqibetlerni Qırım.Aqiqat muhbirine izaatlar eken.
Uquq qorçalayıcınıñ fikirine köre, rus akimiyeti Meclisniñ yasaq etilmesinen bağlı yaqalanuvlarnıñ sayısını arttırmaq mecbur olacaq.
«Şans kimge tüşecegini bilmeymiz, lâkin böyle adiseler eki ya da üç kere degil, bayağı çoq olacaq. Ve böyle olsa, İnsan aqları boyunca Qırım kontakt gruppasınıñ da işi artacaqtır», – dep tahminley uquq qorçalayıcı.
Bundan evel Abdureşit Cepparov mahkeme qararı ile Meclis yasaq etilecegini ve Qırımda qırımtatar faallerine qarşı yañı repressiyalar qullanılacağını tahminley edi.
Sentâbr 29-da Rusiye Yuqarı Mahkemesi bundan ögüne apler ayında Rusiyege bağlı olğan Qırım Yuqarı Mahkemesi tarafından Meclisniñ areketini «ekstrimistik» olaraq tanılması ve toqtatılması aqqında alğan qararını tasdiqladı. Meclisniñ advokatları İnsan alaqı boyunca Avropa mahkemesine muracaat eteceklerini beyan ettiler.
Aprel ayında Meclisniñ areketi yasaqlanğanından soñ Dünya toplulığı rus akimiyetiniñ böyle faaliyetine qatiyen qarşı çıqqan edi. Meclisniñ imayesi Rusiye Yuqarı Mahkemesine şikâyet arizasını yollağan edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
