Link açıqlığı

AQŞ Qırımtatar Milliy Meclisniñ yasaqlanması aqqında Rusiye Yuqarı Mahkemesiniñ qararına qarşı çıqtı.

«Biz Meclisniñ hasiyetini «eksremistik» teşkilât olaraq tanılmasını red etemiz ve bu demokratik qurumnıñ işini toqtatamaq qararına qarşı çıqamız. Rusiyeniñ muntazam surette qırımtatarlarğa nisbetten adaletsiz davranğanı köz ögüne alınsa, bu qarar daa çoq qorqu doğura», - dep beyan etti AQŞ Devlet departamentiniñ temsilcisi Mark Toner sentâbr 30 künü.

AQŞ Devlet departamentinde Rusiye qırımtatarlarğa nisbetten apis cezalarını, siyasiy sebeplerden yapılğan basqılarnı qullanmağa devam etekenini qayd eteler ve Moskvanı deral bunı toqtatmağa çağıralar.

Toner şunı da qayd ete ki, Qırım ile bağlı olğan AQŞ saktsiyaları Moskva Qırım üzerinde kontrolnı Ukrainağa qaytarmağanı qadar devam etecekler.

Sentâbr 29-da Rusiye Yuqarı Mahkemesi bundan ögüne apler ayında Rusiyege bağlı olğan Qırım Yuqarı Mahkemesi tarafından Meclisniñ areketini «ekstrimistik» olaraq tanılması ve toqtatılması aqqında alğan qararını tasdiqladı. Meclisniñ advokatları İnsan alaqı boyunca Avropa mahkemesine muracaat eteceklerini beyan ettiler.

Aprel ayında Meclisniñ areketi yasaqlanğanından soñ Dünya toplulığı rus akimiyetiniñ böyle faaliyetine qatiyen qarşı çıqqan edi. Meclisniñ imayesi Rusiye Yuqarı Mahkemesine şikâyet arizasını yollağan edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG