Link açıqlığı

Qırımtatar Milliy Meclisi azaları fevqulade vaziyetlerde qararlarnı aluv vekâletini Meclis reisine ve mahsus Şurağa teslim etti. Bu aqta Qırımtatar Qurultayınıñ Merkeziy saylav komissiyası reisi Zair Smedlâyev Facebook saifesinde bildirdi.

«Qırımtatar Milliy Meclisi azalarına ve milliy öz-özüni idare etüv organlarınıñ bütün azalarına qarşı kelecekte repressiyalar yapılağacını tahmin etip, fevqulade vaziyetlerde qararlarnı aluv vekâleti Meclis reisine ve mahsus Şurağa teslim etildi», – dep aytıla beyanatta.

Meclis reisi Refat Çubarovnıñ sözlerine binaen, mahsus Şura 8 adamdan ibaret olacaq, onıñ azaları «Rusiye uquq qoruyıcı organları tarafından basım zonasından tış» bulunıp, halqnıñ menfaatlarını temsil etecek.

Zair Smedlâyevniñ qayd etkenine köre, böyle tedbirler, qırımtatar halqınıñ yuqarı temsilci-icra organı yerine «Qırımda nasıldır sanki milliy birleşmelerni» qoymaq ıntıluvlar muvafaqiyetli olmasın dep, yapıla.

Aprel 26-da Rusiyege boysunğan Qırım Yuqarı mahkemesi Meclisniñ işğal etilgen yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketlrine qarşı qattı narazılıq bildirdi. Meclisniñ imayesi Rusiye Yuqarı mahkemesine şikâyet arizasını yolladı.

Rusiye Yuqarı mahkemesi Qırımtatar Milliy Meclisiniñ faaliyeti yasaq etilmesini tasdıqladı, şikâyet arizası red etildi.

Ukraina Tışqı işler nazirligi Meclisniñ Rusiyede yasaq etilecek alda, müessise «qattı cevap» berecegini ilân etken edi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG