Link açıqlığı

Qırımtatar Milliy Meclisi reisi Refat Çubarov sentâbr 30-da Kiyevde keçirilgen brifingde ilân etti ki, işğal etilgen Qırımda qırımtatarlarnıñ taqip etilmesi yañı küçünen başlana bile, dep bildire Qırım.Aqiqat mühbiri.

«Endi, Meclis Rusiye mahkemesi tarafından yasaq etilgen soñ, Qırımda qırımtatarlarnıñ yañı taqip etilüvi başlana bile. Meclisniñ bütün azaları cinaiy mesüliyetke celp etile bile», – dep ilân etti Çubarov.

Bunen beraber, Çubarovnıñ qayd etkenine köre, işğal etilgen Qırımda qağlan Meclis azalarından mesüliyetni çıqarmaq içün, Meclisnen bağlı müim qararlar Kiyevde 8 adamdan ibaret «mahsus şura» tarafından qabul etilecek.

Refat Çubarovnıñ bildirgenine köre, Meclis Rusiyede yasaq etilgen soñ, «Meclis» sözüni aytqan er kes «bunıñ devlet tarafından yasaq etilgen teşkilât olğanını aytmalı».

Aprel 26-da Rusiyege boysunğan Qırım Yuqarı mahkemesi Meclisniñ işğal etilgen yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketlrine qarşı qattı narazılıq bildirdi. Meclisniñ imayesi Rusiye Yuqarı mahkemesine şikâyet arizasını yolladı.

Rusiye Yuqarı mahkemesi Qırımtatar Milliy Meclisiniñ faaliyeti yasaq etilmesini tasdıqladı, şikâyet arizası red etildi.

Ukraina Tışqı işler nazirligi Meclisniñ Rusiyede yasaq etilecek alda, müessise «qattı cevap» berecegini ilân etken edi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG