Link açıqlığı

Rusiye Yuqarı mahkemesi Qırımtatar Milliy Meclisi imayesini diñlemeyip, öz istegine köre areket ete edi, bunen beraber, mahkeme Mecliske doğru şekilde iddiada bulunıp olamadı. Bu aqta Qırım.Aqiqat Radiosınıñ saba yayınında vekâletli adliyeci, «Memorial» uquq qoruyıcı merkeziniñ uquqçısı Kirill Koroteyev bildirdi.

«Qırımtatarlarnıñ yüz biñlerce muracaatı bar olğanı aqqında Poklonskaya hanım efendiniñ (Kremlge boysunğan Qırım sabıq prokurorı – QA) aytqanları... Bulardan iç biri dava işinde yoq. Dava işinde Mecliske yollanılğan ihtar olmaq kerek edi, amma ihtar Mecliske degil de, Refat Çubarovğa çıqarıldı, ve qanun talap etkenine baqmadan, ihtar oña berilmedi», – dep ayttı o.

Sentâbr 29-da, cumaaqşamı künü Rusiye Yuqarı mahkemesinde «Qırımtatar Milliy Meclisi» cemaat birleşmesi faaliyetiniñ yasaq etilmesi aqqında» işi boyunca, «Ekstremistik faaliyetke qarşılıq aqqında» Federal Qanunnıñ 25.07.2002 qabul etilgen 1145-FQ sanlı 9-cı maddesine esaslanıp, toplaşuv keçirildi.

Rusiye Yuqarı mahkemesi Qırımtatar Milliy Meclisiniñ faaliyeti yasaq etilmesini tasdıqladı, şikâyet arizası red etildi.

Aprel 26-da Rusiyege boysunğan Qırım Yuqarı mahkemesi Meclisniñ işğal etilgen yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketlrine qarşı qattı narazılıq bildirdi. Meclisniñ imayesi Rusiye Yuqarı mahkemesine şikâyet arizasını yolladı.

Ukraina Tışqı işler nazirligi Meclisniñ Rusiyede yasaq etilecek alda, müessise «qattı cevap» berecegini ilân etken edi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG