Qırımtatar Milliy Meclisi adliyecileri İnsan aqları boyunca Avropa mahkemesine muracaat etecek ola. Bu aqta Qırım.Aqiqat mühbirine adliyecilerniñ biri Kirill Koroteyev bildirdi.
«Yuqarı mahkeme prezidiyasında nevbetteki şikâyet tehnikiy taraftan etile bile, amma prezidiya cinaiy olmağan işlerni o qadar siyrek diñley ki, daa bir diñlenüv olacağına inanması nafiledir. Ve, demek ki, vaziyetniñ nevbetteki inkişafı – İnsan aqları boyunca Avropa mahkemesine muracaat», – dep ayttı Koroteyev.
Bunen beraber, Koroteyev qayd etti ki, Rusiye Yuqarı mahkemesi sentâbr 29-da qabul etken qararınen Qırım tamır halqını – qırımtatarlarnı – siyasiy teşkilât aqqından, öz başına qararlarnı qabul etmek aqqından marum etti.
«Bu, halqara uquq tarafından kefil olunğan aqlardır, ve bugünki künden (2016 senesi sentâbr 29-dan – QA) başlap, memuriy ve cinaiy taqipler başlanacaq, bu afta prokuratura bunı yapmağa endi başladı (Qırım rusiyeli prokuraturası Umerovnı, Hamzinni para cezasını belgiledi – QA)», – dedi adliyeci.
Rusiye Yuqarı mahkemesi Qırımtatar Milliy Meclisiniñ faaliyeti yasaq etilmesini tasdıqladı, şikâyet arizası red etildi.
Kremlge boysunğan Qırım üyken prokurorı Vladimir Çuhrin toplaşuvda «Meclis faaliyeti devlet ve cemaat havfsızlığı içün telükeli» olğanını israrlıqnen aytqan edi.
İmaye tarafınıñ qayd etkenine köre, Meclisniñ davalı olması mümkün degil, çünki bu, cemaat teşkilâtı degil. İmayeciniñ bildirgenine köre, Meclis organları diger devletniñ (Ukraina) toprağında faaliyet alıp bara, böyle etip, Rusiye antiekstremistik qanunları çalışmağan topraqta Qırımtatar Milliy Meclisini yasaq etmek mümkün degil.
Sentâbr 29-da, cumaaqşamı künü Rusiye Yuqarı mahkemesinde «Qırımtatar Milliy Meclisi» cemaat birleşmesi faaliyetiniñ yasaq etilmesi aqqında» işi boyunca, «Ekstremistik faaliyetke qarşılıq aqqında» Federal Qanunnıñ 25.07.2002 qabul etilgen 1145-FQ sanlı 9-cı maddesine esaslanıp, toplaşuv keçirildi.
Aprel 26-da Rusiyege boysunğan Qırım Yuqarı mahkemesi Meclisniñ işğal etilgen yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketlrine qarşı qattı narazılıq bildirdi. Meclisniñ imayesi Rusiye Yuqarı mahkemesine şikâyet arizasını yolladı.
Ukraina Tışqı işler nazirligi Meclisniñ Rusiyede yasaq etilecek alda, müessise «qattı cevap» berecegini ilân etken edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
