Sentâbr 29-da, cumaaqşamı künü Moskvada Rusiye Yuqarı mahkemesinde Meclisniñ yasaq etilmesi aqqında iş boyunca toplaşuv devam ete. Radio Svoboda mühbiriniñ bildirgenine binaen, zalda imaye tarafı sözde bulundı – adliyeciler Marina Agaltsova ve Kirill Koroteyev Meclisniñ yasaqlanması qararınıñ lâğu etilmesi içün deliller ketirdi.
İmaye tarafınıñ qayd etkenine köre, Meclisniñ davalı olması mümkün degil, çünki bu, cemaat teşkilâtı degil.
«İnsanlar gruppasını ğayrı ticariy olğanını tanımaq içün, bu teşkilâtnıñ nizamnamesi olması kerek. Qırımtatar Milliy Meclisiniñ böyle nizamnamesi yoq ve olması mümkün degil», – dep ayttı adliyeci Koroteyev.
Qırımtatar halqı Qurultaynı saylay, Qurultay azaları ise – 33 kişiden ibaret olğan Meclisni, dep qayd etti o.
«Onıñ (Meclisniñ – QA) faaliyeti Birleşken Milletler Teşkilâtınıñ tamır halqlar aqları aqqında 5-ci maddesinen belgilene, buña binaen, tamır halqlarnıñ öz ayrı siyasiy ve uquq müessiselerini saqlav ve qaviyleştirüv aqqı bar», – dedi adliyeci.
Adliyeci, Meclisniñ yasaq etilmesi aqqında qararnıñ lâğu etilmesi içün daa bir delil «davanıñ mahkemeler arasında yañlış üleştirilüvi» olğanını ayttı. İmayeciniñ qayd etkenine köre, Meclis organları diger devletniñ (Ukraina) toprağında faaliyet alıp bara, böyle etip, Rusiye antiekstremistik qanunları çalışmağan topraqta Qırımtatar Milliy Meclisini yasaq etmek mümkün degil.
Mahkeme zalında saat 14:00-ke qadar teneffüs ilân etildi.
Sentâbr 29-da, cumaaqşamı künü saat 11.00-de Rusiye Yuqarı mahkemesinde «Qırımtatar Milliy Meclisi» cemaat birleşmesi faaliyetiniñ yasaq etilmesi aqqında» işi boyunca, «Ekstremistik faaliyetke qarşılıq aqqında» Federal Qanunnıñ 25.07.2002 qabul etilgen 1145-FQ sanlı 9-cı maddesine esaslanıp, toplaşuv keçirile.
Aprel 26 Rusiyege boysunğan Qırım Yuqarı mahkemesi Meclisniñ işğal etilgen yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketlrine qarşı qattı narazılıq bildirdi. Meclisniñ imayesi Rusiye Yuqarı mahkemesine şikâyet arizasını yolladı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
